«Ўзбектелеком» компанияси B2O (оператор–ҳамкорлар) сегменти стратегиясини муҳокама қилиш учун ўзининг топ-менежерлари ва мамлакатнинг телекоммуникация хизматлари провайдерлари вакилларини йиғди. «Ҳамкорликнинг янги формати» мавзусидаги норасмий учрашув 5 июль куни «GroundZero» коворкинг марказида бўлиб ўтди.

Иштирокчиларни қизиқтирган асосий масалалар – ушбу ҳамкорликда шаффофлик ва тезкорликни йўлга қўйиш, ягона техник қўллаб-қувватлашни ташкил этиш, интернет-каналлар ва IP-транспорт нархларини оптималлаштириш бўлди.

«Ўзбектелеком» АК бош директори Фарҳод Рўзиев компания тузилмасини қайта кўриб чиқиш ва алоҳида B2O раҳбариятини тузиш ҳақида гапирди, шу ўринда B2O сегменти ҳамкорлар билан алоқа масалаларини қисқа муддатларда ҳал қилувчи ўз мутахассисларига эга бўлади.

2018 йил охиригача интернет-канал нархларини пасайтириш ва мавжуд сиғимларни оператив ошириш режалаштирилмоқда. Шу билан бирга, «минимум» дастуридаги вазифаларга каналларни ижарага бериш тарифларини пасайтириш бўйича нархномаларни қайта кўриб чиқиш киритилган.

Операторлар ва провайдерлар учун кенг полосали уланишни ривожлантириш бўйича франчайзинг шериклик модели таклиф этилади.

Йиғилишда қайд этилганидек, тарифлар қайта кўриб чиқилади ва «Ўзбектелеком» АК инфратузилмаси ижараси бўйича ягона ҳужжат ишлаб чиқилади. Кенг полосали интернет-портларни ижарага бериш сиёсати ҳам тўлиқ қайта кўрилади.

Провайдерлар ва телекоммуникация операторлари «Ўзбектелеком» АК билан самарали ҳамкорликнинг янги форматига ўтилганини қувонарли ҳолат сифатида баҳолашди.