Таиланднинг Чулалонгкорн университети энтомолог-олимлари янги кашф қилинган паразит ариларга теннис юлдузлари — Рафаэл Надал ва Рожер Федерер номини беришди. Тадқиқотга бағишланган мақола ZooKeys илмий журналида чиқди.

«T. rogerfedereri ҳамда T. rafaelnadali — паразит арилар бўлиб, уларнинг личинкалари ўз эгалари танасини ичидан еб битиради», — деди илмий иш муаллифи Бунтика Арекул Бутчер.

Янги ариларнинг тана узунликлари деярли бир хил — 6 мм атрофида бўлиб, қора, оқ ва тўқ сариқ рангларда. Улар Таиланддаги йирик миллий боғларда (Кхао Яй ва Кхао Сок) топилган.

Рафаэл Надал — испаниялик теннисчи, жаҳоннинг собиқ биринчи ракеткаси. Катта дубулға турнирларида яккалик баҳсларида 22 марта ғолиб бўлган, Франция очиқ чемпионатини 14 бора ютган.

Рожер Федерер — швейцариялик теннисчи, жаҳоннинг собиқ биринчи ракеткаси, Катта дубулға турнирларининг 20 карра ғолиби.

Кўп маротаба кортда ўзаро рақиб бўлган Надал ва Федерер жаҳон теннисининг «катта тўртлиги»га киритилган (Новак Жокович ва Эндрю Маррей билан биргаликда).