Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

МДҲнинг қамоқдаги ва қувғинга учраган собиқ президентлари. Улар кимлар?

МДҲнинг қамоқдаги ва қувғинга учраган собиқ президентлари. Улар кимлар?

Фото:«Asia Plus»

Бир неча кун аввал Қирғизистоннинг собиқ президенти Алмазбек Атамбаев қамоққа олинди. Атамбаевгача МДҲнинг бошқа давлатларида ҳам президентларнинг қамоққа олиниши, қувғинга учраши кузатилган. «Азия Плюс» нашри тақдири шу тарзда тугаган собиқ раҳбарларни эсга олди. 

Михаил Саакашвили

Грузиянинг собиқ президенти Михаил Саакашвилига бир неча жиноятлар бўйича 2014 йилда мамлакат прокуратураси томонидан сиртдан айблов қўйилган. Жумладан, у 8,8 миллион ларилик давлат мулкини талон-тарож қилишда айбдор деб топилган. 2013 йил Георгий Маргвелашвили президент бўлгач, Саакашвили Грузиядан чиқиб кетди ва ҳалигача қайтгани йўқ. Бу орада у Украинада бир қанча саргузаштларни бошдан кечирди. Украина раҳбари Порошенко унга 2016 йил фуқаролик берди. Аммо бироз ўтиб унга яна иш қўзғатилди, фуқаролик тортиб олинди.

Ниҳоят В.Зеленский 2019 йил майида Саакашвилининг фуқаролиги қайтариб берди. 

Роберт Кочарян

Арманистоннинг иккинчи президенти Роберт Кочарян 2018 йил 28 июнда қамоққа олинган. Унга ўша вақтда конституцион тузумни ағдариш айблови билан қамоққа олинган, икки ҳафтадан сўнг қўйиб юборилган эди. Бироқ, Кочарян очиқда узоқ юра олмади. 2018 йил декабрида яна айблов эълон қилинди. Кочарян ҳануз ўзига қўйилган айбларни тан олмаган ва айбловларни амалдаги ҳукуматнинг буюртмаси деб билади. 

Виктор Янукович

Украинанинг тўртинчи президенти саналган Виктор Янукович (2010-2014 йилларда) 2014 йил февраль воқеаларидан кейин мамлакатдан чиқиб кетди ва кейинроқ у Россияда эканлиги маълум бўлди. Янукович давлатга хиёнат ва жиноий гуруҳ ташкил қилишда айбланди. 2017 йил Киевнинг Оболон туман суди уни сиртдан 13 йиллик қамоқ жазосига ҳукм қилди. 

Айни дамда ҳам Янукович Россияда истиқомат қилмоқда. 

Аскар Акаев

Қирғизистонда 2005 йилги воқеалар биринчи президент Аскар Акаевнинг қочиб кетиши билан якунланганди. Мамлакат Жогорку Кенеши 11 апрелда унинг истеъфоси ҳақида қарор қабул қилганди.

Уни мамлакатга қайтариш бўйича Россияга бир неча марта сўров юборилди. Аммо уларга жавоб бўлгани йўқ. Акаев ҳамон хорижда истиқомат қилаётир. 

Курманбек Бакиев

Бакиев Акаевдан сўнг, 2005 йилги инқилоб натижасида ҳокимият тепасига келганди. У 2009 йилда иккинчи марта президентликка сайланди. Аммо шу вақтда яна Қирғизистонда можаролар бошланди. Натижада Бакиев Беларусга қочиб кетишга мажбур бўлди. 

2013 йилда Қирғизистон суди уни сиртдан 24 йиллик қамоққа ҳукм қилди. 

Шунингдек...

Украинанинг бешинчи президенти Петро Порошенкога ҳам аллақачон 12 та жиноий иш очилди. Тўғри, Порошенко ҳозирда озод, аммо унинг келажаги қандай бўлишини эса вақт кўрсатади. 

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг