Муҳаммад ал-Хоразмий номидаги Тошкент ахборот технологиялари университетининг бир гуруҳ профессор-ўқитувчилари Беларусь давлат информатика ва радиоэлектроника университетида икки ҳафталик малака алмашиш ўқув-амалий жараёнларида иштирок этишди. Бу ҳақида университет матбуот хизмати хабар бермоқда.

Ҳар бир дарс ва семинар-тренинглар алоҳида-алоҳида бўлимларда ташкил этилди. Хусусан, ТАТУнинг 24 нафар профессор-ўқитувчиси БДИРУда «Ахборот тизимларини лойиҳалашнинг замонавий усуллари ва технологиялари», «Корхонанинг замонавий IТ-инфратузилмаси: дизайн ва амалиёт», «Big data», «Тиббий ускуналар технологияси» фанлари бўйича малака оширди. Бундан ташқари, ўқитувчилар учун университетнинг ахборот ва компьютер тизимлари, электрон ускуналар ва технологиялар, ахборот-радиотехника ва бошқаларни лойиҳалаш бўлимларига сафар уюштирилди.

30 июль куни ТАТУ профессор-ўқитувчилари икки ҳафталик малака оширишнинг охирги кунида БДИРУ ректори Вадим Богуш билан учрашишди. Тадбирда ўқитувчиларга махсус сертификатлар ва эсдалик совғалари топширилди.