АҚШ президенти Доналд Трамп ўз маъмуриятининг биринчи иш йили Америка тарихидаги энг муваффақиятли йил бўлганига ишонади.

У бу ҳақида Вашингтонда бўлиб ўтган консерваторлар (Consevative Political Action Conference) конференцияда маълум қилди.

«Ростини айтганда, менинг маъмуриятим учун (ўзим учун эмас) биринчи йил қолган барча АҚШ президентлариники билан солиштирганда энг яхши йил бўлди. Мен бунга ишонаман!», — деди Трамп.

Сўзининг исботи сифатида у солиқ ислоҳотлари, фойдасиз савдо келишувларидан воз кечиш, иммиграция ва соғлиқни сақлаш соҳаларидаги ўзгаришлар ҳақида гапирган. 

22 январь куни эса «Gallup» агентлиги эълон қилган сўров натижаларига кўра америкаликларнинг атиги 38,4 фоизи Трампнинг биринчи йил олиб борган ишларини маъқуллаши маълум бўлганди. Бу ундан аввалги президентларнинг натижасидан камида 10 фоиз паст, чунки унгача Билл Клинтондан бошқа бирор президент 50 фоиздан паст натижани кўрсатмаган.

Яқинда «Quinnipac University» эълон қилган рейтингда эса Трампнинг кўрсаткичи яна ҳам тушиб кетган: аҳолининг 37 фоизи уни қўллаган, 58 фоизи эса унинг фаолиятидан қониқмаганини билдирган.