АҚШ президенти Доналд Трамп Венесуэлага қатнаётган санкция остидаги нефт танкерларига қарши денгиз қамалини эълон қилди.

«Бугун мен Венесуэлага ва Венесуэладан келаётган АҚШ санкциялари остидаги барча нефт танкерларини тўлиқ блокада қилишни буюрдим», — дейилади Трамп Truth Social ижтимоий тармоғида жойлаган постда.

Трамп ушбу узун постида Николас Мадуро бошчилигидаги Венесуэла ҳукуматини АҚШ мулкини ўғирлашда (қарийб 20 йил аввал ушбу мамлакатда нефт конлари миллийлаштирилганини назарда тутган — таҳр.), терроризм, гиёҳванд моддалар савдоси, одамлар контрабандаси ва қотилликларда айблади.

«Жанубий Америка тарихидаги энг йирик Армада Венесуэлани бутунлай қуршаб олди. Улар илгари биздан ўғирланган барча нефт, ер ва бошқа мулкларни Қўшма Штатларга қайтармагунича, қамал кенгайишда давом этади», — деди Трамп.

У шунингдек, АҚШ Николас Мадуро ва унинг атрофидагиларни «хорижий террорчилик ташкилоти» деб эълон қилганини (24 ноябрда) эслаб ўтди.

Ўтган ҳафта АҚШ ҳарбийлари Венесуэла қирғоқлари яқинида нефт ортилган Skipper танкерини қўлга олганди. АҚШ ушбу танкерга 2022 йилда санкция киритган — унинг нефт контрабандасидан тушган пуллар «Ҳизбуллоҳ» ҳамда Эрон Ислом инқилоби қўриқчилари корпусининг «Ал-Қудс» бўлинмасини молиялаштиришга сарфланаётгани даъво қилинган.

Эслатиб ўтамиз, Доналд Трамп ноябрнинг охирида Венесуэла осмони ёпилганини эълон қилганди.