Айтжан Халмаханов 24 йиллик танаффусдан сўнг Ўзбекистонга юнон-рум кураши бўйича жаҳон чемпионлигини туҳфа қилди.

Хорватиянинг Загреб шаҳрида ўтаётган спорт курашлари бўйича жаҳон чемпионатида юнон-рум кураши бўйича Ўзбекистон терма жамоаси аъзоси Айтжан Халмаханов олтин медални қўлга киритди.

-63 кг вазн тоифасида баҳс олиб борган ҳамюртимиз ҳал қилувчи беллашувда жанубий кореялик Чунг Хан-Жаени 8:0 ҳисобида мағлубиятга учратди.

Бу сўнгги 24 йил ичида юнон-рум кураши бўйича дунё биринчилигида ўзбекистонлик атлетларнинг қўлга киритган дастлабки олтин медали бўлди.

Маълумот учун: юнон-рум кураши бўйича жаҳон чемпиони бўлган илк ўзбекистонлик атлет — Дилшод Орипов. Патри (Греция)да 2001 йилда ўтган жаҳон чемпионати финалида у -58 кг вазн тоифасида арманистонлик Карен Мнацаканянни енгиб, олтин медални қўлга киритган.

Шу тариқа, Ўзбекистон терма жамоаси Загребдаги мусобақада 1 та олтин, 1 та кумуш ва 3 та бронза медални жамғаришга эришди.

Олтин медал:

-63 кг: Айтжан Халмаханов (юнон-рум кураши)

Кумуш медал:

-60 кг: Алишер Ғаниев (юнон-рум кураши)

Бронза медал:

-57 кг: Ғуломжон Абдуллаев (эркин кураш)

-65 кг: Умиджон Жалолов (эркин кураш)

-72 кг: Абдулло Алиев (юнон-рум кураши)