«Манчестер Сити» Ўзбекистон терма жамоаси ҳимоячиси Абдуқодир Ҳусанов билан янги беш йиллик шартнома имзолаганини расман эълон қилди. Янги келишувга кўра, футболчи клуб сафида 2031 йилгача тўп суради.

Ҳусанов Англия клубига 2025 йил январ ойида келиб қўшилган бўлиб, қисқа вақт ичида жамоанинг асосий футболчиларидан бирига айланди. 2025/26 йилги мавсумнинг иккинчи ярмида у Марк Гейи билан марказий ҳимояда ишончли тандем ҳосил қилиб, жамоанинг сўнгги 19 та АПЛ учрашувидан 16 тасида майдонга тушди. Шунингдек, Англия кубоги ва Лига кубоги финалларида ҳам муҳим роль ўйнади, дейилади клуб матбуот хизматининг хабарида.

Таъкидланишича, 22 ёшли ҳимоячи «Манчестер Сити» сафида атиги 47 та ўйин ўтказганига қарамай, юқори тезлиги ва самарали ҳимоявий ҳаракатлари билан Премьер-лиганинг энг истиқболли ёш футболчиларидан бири сифатида эътироф этилди. У, шунингдек, клубнинг 2025/26 йилги мавсумдаги энг яхши футболчиси соврини учун номзодлар учлигидан ҳам жой олган эди.

Бундан ташқари, Ҳусанов Ўзбекистон терма жамоасининг тарихда илк бор Жаҳон чемпионатига йўлланма олиши йўлида ҳам муҳим ҳисса қўшди.

Янги шартнома имзолангач, Абдуқодир Ҳусанов клубда қолаётганидан мамнунлигини билдириб, «Манчестер Сити»да ҳар куни ривожланаётганини таъкидлади.

«Бу мен ва оилам учун жуда қувончли кун. Манчестерга келганимдан буён ҳар бир лаҳзадан завқ олдим ва футболчи сифатида кўп нарсани ўргандим. Энди янги вазифам — Энсо Мареска ва унинг мураббийлар штабига ўзимни намоён этиш ҳамда жамоада мунтазам ўрин эгаллаш. Мухлисларга қўллаб-қувватлагани учун раҳмат. Энди бор эътиборим клуб муваффақияти учун бор кучимни беришга қаратилган», — деди Ҳусанов.

Клубнинг футбол бўйича директори Угу Виана эса Ҳусановнинг Англияга келганидан буён ривожланишидан мамнун эканини билдириб, унинг жаҳон даражасидаги марказий ҳимоячига айланиши учун барча имкониятларга эга эканини таъкидлади. Унинг сўзларига кўра, 22 ёшли футболчининг энг яхши йиллари ҳали олдинда ва у Энсо Маресканинг режаларида муҳим ўрин тутади.