Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Санжар Машриқий

Худодан сўраб, бекор ётма! (арман халқ мақоли)

Фақат «Реал Мадрид» мухлислари ўқисин!

Фақат «Реал Мадрид» мухлислари ўқисин!

«Мбаппе эртаги» мадридликлар учун ёмон натижа билан якунига етди. Француз гарчи «бланкос» либосида ўйнаш болаликдаги орзуси эканлигини айтиб келса-да, қатарлик шайхлар уни жамоада сақлаб қолишни уддалашди.

Флорентино Перес трансфер сиёсатидаги, эҳтимол, энг катта мағлубиятини ҳам қабул қилиб олди, дерсиз. Ҳа, балки шундайдир ҳам. Катта трансферларда «айёр тулки» бўлиб кетган, истаган футболчисини ҳатто ашаддий рақибларидан ҳам (Фигу воқеаси) олиб қўядиган Перес бу сафар «тарсакининг зўри»ни олди. Килианнинг Мадриддаги эҳтимолий юлдузлиги сабаб Ҳоланд трансфери ҳам «тагига олиб» кетди. Хуллас, қатарликларнинг «қизғанчиқлиги»дан катта пул ишлаб олган Мбаппе «Реал Мадрид»дан битта «узр» билан қутилмаса ҳам керак. Айрим манбаларнинг ёзишича, «Реал» ва Мбаппе ўртасида йил бошида келишув имзоланган. Унга кўра, трансфер йўққа чиқадиган бўлса, футболчи 100 млн евро жарима тўлаши керак бўлади. Агар шундай бўлса, «ПСЖ»нинг «янги қироли» учун бу жаримани ҳам Носир Ал Хилайфий тўлайдими?

Парижнинг суперюлдузи трансфери ўхшамагани Мадрид жамоасини «Б режаси»сиз қолдирди, дейиш нотўғри бўлади. Перес французнинг трансфери ўхшамаслигига шубҳа қилмаган, аммо бу футбол магнатини қўшимча режаларсиз юради, дегани эмас. Агар 100 млн евро жарима ҳақиқат бўлиб чиқса, бу пулга исталган топ ҳужумчини Мадридга олиб келиш мумкин бўлади. Ҳақиқат бўлиб чиқмаган тақдирда ҳам, Мбаппега сарфланиши керак бўлган суммага бир нечта яхши футболчини олиб келиш қийин эмас. Бундан ташқари айрим трансферларни ҳисобга олмаса, Перес уч мавсумдан бери «сандиғига пул босиб» юрибди. Мақолада «Реал Мадрид» ҳужумини Мбаппесиз ҳам даҳшатли кўринишга келтирадиган бешта номзодни кўриб чиқамиз.

Аурелиен Чуамени. Foto: Gong.bg

Аурелиен Чуамени – «Монако»

Дунёнинг топ клублари 22 ёшли франциялик ярим ҳимоячига қизиқиш билдиришмоқда. ESPN хабарига кўра, Мбаппенинг трансфери ўхшамагач, энг аввал «Монако» футболчиси Перес нишонига тушган. «Бавария», «Ливерпул» ва «Челси» ҳам футболчи хизматига жиддий хоҳиш билдирмоқда. Шунга қарамасдан, трансфер суммаси катта футболчини олиб ўрганмаган «Бавария» ва «Ливерпул»га қимматлик қилса, санкциялар билан курашаётган «Челси» учун ноқулай.

Айни пайтда Аурелиен Чуамени трансфермаркет порталида 40 млн еврога баҳоланмоқда. Мадрид учун бу катта пул эмас, бундан ташқари унинг маоши ҳам юқори бўлмайди.

Нега «Реал Мадрид»га мос?

Чуамени асосан таянч нуқтасида тўп суради. У Каземирога муносиб ўринбосар бўла олади. Камавинга билан рақобат Аурелиен учун муаммо эмас. Жисмонан бақувват ва тезкор, қарши ҳужумларда Мадрид жонига аро кириши мумкин.

Жоау Фелиш. Foto: Sportbox

Жоау Фелиш – «Атлетико Мадрид»

«Бенфика»дан 113 миллион фунт стерлингга сотиб олинган Фелиш ҳамма истагандек Ла Лига юлдузига айланиб кета олмади. Дунёдаги кўплаб спорт нашрлари португалияликни «Реал» ҳужуми учун энг муносиб номзод сифатида талқин этишмоқда. 22 ёшли Жоаунинг шартномаси 2026 йилгача мўлжалланган бўлса-да, ўзи ҳам «Атлетико»ни тарк этишни истисно этмаяпти. «Реал Мадрид» учун унинг трансфер пули озгина ноқулай бўлиши мумкин. Айни пайтда португални трансфермаркет платформаси 70 млн еврога баҳоламоқда, бироқ ўзаро томонлар келиша олса, бу 50 млнгача қисқариши мумкин.

Нега «Реал Мадрид»га мос?

Жоау Фелишнинг асосий позицияси ҳужумчи ортида ҳаракат қилишдир. Бундан ташқари қанотда ҳам эркин ўйнай олади. Ёзда Асенсионинг сотилиши ҳақидаги гап сўзлар унга жамоа таркибида ўз ўрнини топа олишига ёрдам берса, ажабмас. Бу қанотда ҳаракат қилаётган Родриго мавсум сўнгида фантастик ўйин кўрсатган эрса-да, Феликснинг келиши Мадрид ҳужумини анча кучайтиришига шубҳа йўқ.

Кристофер Нкунку. Foto: Football.ua

Кристофер Нкунку, «РБ Лейпциг»

Шартномаси 2024 йили тугаши кутилаётган Кристофер Нкунку бу мавсумни ажойиб тарзда ўтказди. Бундеслига жамоаси учун 34 та гол, 20 та голли узатма берди. Ҳужумкор ярим ҳимоячи прессингда яхши ўйнаши билан донг таратган, дейишимиз мумкин. Нкункунинг ёши, малакаси ва кўп қирралилиги уни янада Мадрид учун керакли қилмоқда. Трансфер нархи 60-65 млн евро атрофида.

Нега «Реал Мадрид»га мос?

Нкунку майдонда Модричга ўхшаб ҳаракат қилади. Албатта, хорватнинг ўрни ҳозирча кафолатланган бўлса-да, унга ўринбосар бўлиши «бланкос» учун муҳим трансфер мақсадидир.

Муҳаммад Салоҳ. Foto: Nearfootball.com

Муҳаммад Салоҳ, «Ливерпул»

Салоҳнинг тез-тез Испания пойтахтига кўчиб ўтиши ҳақидаги хабарлар чиқиб туради. Мбаппе трансфери ўхшамагач, мисрлик футбол юлдузи билан шартнома имзолаш айни муддао бўлар эди. Гарчи у «қизиллар»дан бошқа жамоада ўзини юқори даражада кўрсатган бўлмаса-да, замонавий футболда катта ишларга қодирлиги ҳаммамизга маълум. Хусусан, у АПЛдек мураккаб лигада Бензема каби гол ва ассистлар борасида тенгсиз бўла олди. Келаси ой 30 ёшга тўладиган Салоҳга ҳафтасига 400 минг фунт маош тўлай оладиган клублар кўп эмас. Шундай экан агар мисрлик лигасини ўзгартиришга рози бўлса, унинг кейинги манзили Испания бўлиши мақсадга мувофиқдир. Салоҳнинг трансфери 80-100 млнга айланиши мумкин.

Нега «Реал Мадрид»га мос?

Матбуотда Муҳаммад Салоҳ «Реал»ни «душман» сифатида кўриши ҳақида ёзишса-да, аслида пул ҳамма нарсани ҳал қилишини амалда кўрдик. Ўнг қанотда унинг бўлиши Вини-Бензема-Салоҳ триосини ҳосил қилади. Ном жиҳатдан ёмонмас-а?! Эҳтимол, ЕЧЛ финалида «Реал» «Ливерпул»дан нафақат кубок, балки Салоҳни ҳам ютиб олар!? Ҳаммаси вақт масаласи…

Дарвин Нуньес. Foto: Gong.bg

Дарвин Нуньес, «Бенфика»

Дарҳақиқат, Карим Бенема бу мавсумда наинки Европанинг энг яхши ҳужумчиларидан бири бўлди, эҳтимол энг яхшиси ҳамдир. Бироқ бу — 34 ёшли Карим доим шундай стабил ўйнайди дегани эмас. 21 ёшли Дарвин Нуньез эса келажакда унинг ўрнини билдирмаслиги мумкин. Лука Йович ва Мариано Диаз французнинг яқинига ҳам кела олишмади. Уругвайлик форвард «Ливерпул», «Бавария» ва «Барселона»га қарши баҳсларда ўзини кўрсата олди. Трансфер қиймати ҳам унча юқори эмас. Ҳозирда трансфермаркетда унинг нархи 40 млн евро атрофида баҳоланган. Мазкур футболчини Эдисон Каванига кўп солиштиришади. Унда уругвайликларга хос ҳужумкорлик руҳияти бор. Нуньес трансфери устида ишлаётган «Манчестер Юнайтед» «Реал» билан рақобат олиб боради.

Нега «Реал Мадрид»га мос?

Дарвин Нуньес  совуққон футболчи. Юқорида айтилганидек, Бенземага муносиб ўринбосар бўлиши мумкин. Бўйдор ва тезкорлиги Рамоссиз мадридликларнинг бош билан самаралироқ ўйнашларини таъминлаши мумкин.

Перес юқоридаги беш футболчи учун 250-300 млн евро сарфлашига тўғри келади.

Криштиану Роналду, Ҳарри Кейн ёки Роберт Левандовски Мбаппенинг ўрнини бемалол босиши мумкин эди, аммо Перес бу трансферларга эътибор қаратмаса керак. Биринчидан Роналдунинг клубга қайтиши энди аввалгидай фойдали эмас ва усиз ҳам жамоа ўйнашни ўрганиб олган. ЕЧЛга йўлланма ола олмаган Роналду балки ўз хизматларини таклиф ҳам этар. Ҳарри Кейн трансфери ҳам мадридликлар учун ноқулайроқ. Биринчидан, Кейн асосан марказда ўйнайди. Карим бу ўринни яна бир мавсумсиз кимгадир бериши даргумон. Иккинчидан эса, «Тоттенхэм» Конте қўл остида яхши ўйинлар ўтказмоқда ва кейинги мавсумда топ ҳужумчини қўйиб юбормасликка ҳаракат қилса керак. Лева билан эса вазият бошқачароқ. Польшалик жамоасини ўзгартирмоқчи. У гарчи марказда Бензема билан тандемда ҳаракат қила олса-да, унинг «Барселона»га ўтиши қулайроқ. Бироқ унинг трансфер қиймати юқори эмаслиги Флорентино Пересни бу ҳақида ўйлаб кўришига сабаб бўлиши мумкин.

Бундан ташқари «Реал»ни кучайтириши мумкин бўлган Жамол Мусаила, Жуд Беллингем, Хоакин Корреа, Никола Барелла каби футболчилар трансфери ҳам шу ёзнинг ўзидаёқ кўриб чиқилиши мумкин. Бундан ташқари «Милан» билан А Cерия ғолиби бўлган Браим Диаз ҳам ортга қайтарилиши мумкин. «Бланкос» шу трансфер ойнасидаёқ жамоани анча ёшартириб олиш имкониятига эга.

Мбаппе, шубҳасиз, супер иқтидор соҳиби. Жаҳон футболи келажаги ҳамдир. Аммо унинг Мадрид жамоасига келиб қўшилмагани фожиа эмас. Килиан жаҳон футболига кириб келишдан олдин ҳам «Реал Мадрид» бор эди, ундан кейин ҳам бўлади. «Реал» ҳеч қачон юлдузларсиз жамоа бўлиб қолмаган. Роберто Карлос, «сўйлоқ» Роналдо, Раул, Зидан, Касильяс, Рамос, Роналду ва яна қатор мега-юлдузлар жамоани тарк этгач ҳам «мадрид даҳоси» сўниб қолган эмас ёки Роналдиньо, Марадона, Пеле, Мессининг «бланкос» либосида ўйнамагани жамоани чўктириб юбормаган.

Барча факторларга қарамай, «Реал Мадрид» келажакда ҳам энг номдор клублардан бўлиб қолаверади. Мбаппе-чи? Буниси эса савол…

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг