Prezident yangi tahrirdagi «O‘simlik karantini to‘g‘risida»gi qonunni imzoladi
![Prezident yangi tahrirdagi «O‘simlik karantini to‘g‘risida»gi qonunni imzoladi](https://xabar.uz/static/crop/3/9/920__95_3995614224.jpg)
Prezident yangi tahrirdagi «O‘simliklar karantini to‘g‘risida»gi qonunni imzoladi. Bu haqda Adliya vazirligining «Huquqiy axborot» kanalida xabar berildi.
Qonunning maqsadi o‘simliklar karantini sohasidagi munosabatlarni tartibga solishdan iborat.
Qonunda o‘simliklar karantini sohasini tartibga solish, o‘simliklar karantini bo‘yicha davlat xizmati tizimi va unga rahbarlik qilish, davlat va xo‘jalik boshqaruvi organlarining, yuridik va jismoniy shaxslarning o‘simliklar karantini sohasidagi huquq va majburiyatlari, o‘simliklar karantiniga doir tadbirlar va ularni amalga oshirish, o‘simliklar karantini sohasidagi axborotning ochiqligi, karantin ostidagi mahsulotni olib kirish va olib chiqish, shuningdek yakunlovchi qoidalar nazarda tutilgan.
Xususan, qonunga muvofiq karantin ostidagi mahsulotga, uni olib kirishga, olib chiqishga, ishlab chiqarishga, qayta ishlashga, saqlashga, tashishga, realizatsiya qilishga va yo‘q qilishga doir talablarni belgilaydigan, davlat va xo‘jalik boshqaruvi organlari, yuridik va jismoniy shaxslar tomonidan bajarilishi shart bo‘lgan hujjatlar fitosanitariya talablaridir.
Shu bilan birga, o‘zgartishlarga muvofiq fuqarolarning o‘zini o‘zi boshqarish organlari o‘simliklar karantini sohasidagi davlat dasturlarini, hududiy va boshqa dasturlarni amalga oshirishda ishtirok etadi, tegishli hududda o‘simliklar karantini sohasida jamoatchilik nazoratini amalga oshiradi, tegishli hudud aholisini o‘simliklar karantini ob’yektlari tarqalganligi to‘g‘risida xabardor qilishda o‘simliklar karantini davlat inspektorlariga ko‘maklashadi.
Bundan tashqari, qonun bilan o‘simliklar karantini bo‘yicha davlat xizmati organlari tizimi qayta ko‘rib chiqilgan. Jumladan, O‘simliklar karantini bo‘yicha davlat xizmati tizimini:
O‘simliklar karantini davlat inspeksiyasi;
Qoraqalpog‘iston Respublikasi, viloyatlar va Toshkent shahar o‘simliklar karantini davlat inspeksiyalari;
O‘simliklar karantini ilmiy markazi;
avtomobil yo‘llaridagi, temir yo‘l stansiyalaridagi, aeroportlardagi, daryo portlaridagi va pochtamtlarning punktidagi o‘simliklar karantini chegara punktlari tashkil etadi.
Ta’kidlash lozimki, O‘simliklar karantini bo‘yicha davlat xizmatining ilmiy ta’minotini O‘simliklar karantini ilmiy markazi amalga oshiradi.
O‘simliklar karantini ilmiy markazi o‘simliklar karantini ob’yektlarining bioekologik xususiyatlarini va ularga qarshi kurashish usullarini o‘rganish bo‘yicha ilmiy-tadqiqotlar olib boradi, o‘simliklar karantini ob’yektlariga qarshi kurashish sohasi xodimlarining kasbiy bilimlari va malakasi oshirilishini, o‘simliklar karantini ob’yektlari to‘g‘risidagi bilimlarning aholi o‘rtasida tarqatilishini ta’minlaydi.
Qonun 2018-yil 10-iyuldan kuchga kirdi.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter