Iqtisodiy tadqiqotlar va islohotlar markazi hisob-kitobiga ko‘ra, 2026-yil avgust oyida Ishbilarmonlik faolligi indeksi 990 birlikni tashkil qildi. Bu iyul oyiga nisbatan 1 foizga kam.

Shu bilan birga, yilning mos oyiga nisbatan indeks 29 foizga yuqori bo‘lgan. Demak, oylik pasayishga qaramay, ishbilarmonlik faolligi yillik taqqoslashda o‘sishda davom etgan.

Indeks tarkibida bank hisobvaraqlaridagi operatsiyalar soni 6,2 foizga kamaygan. Birja komponenti 2,7 foizga, faoliyat yuritayotgan xo‘jalik subyektlari komponenti esa 2,3 foizga oshgan. Tovar belgilari bo‘yicha komponent 12,5 foizga pasaygan.

Avgustda ishbilarmonlik faolligining birja komponenti 1,0267 birlikni tashkil etib, bir oyda 2,7 foizga o‘sgan. Bunda bitim boshiga sotib olingan tovarlarning o‘rtacha hajmi 21,1 foizga oshgan, bitimlar soni esa 15,8 foizga kamaygan.

Respublika tovar-xom ashyo birjasida asosiy 34 turdagi tovarlar savdosining umumiy qiymati 9 trln 138 mlrd so‘m bo‘lgan. Bu iyul oyiga nisbatan 6 foiz kam. Shu bilan birga, omuxta yem savdosi 11,4 baravar, ko‘mir 7,6 baravar oshgan.

Faoliyat yuritayotgan xo‘jalik subyektlari komponenti 2,3 foizga o‘sgan. Korxonalar soni 11 620 taga ko‘payib, 547,6 mingtaga yetgan. Yirik korxonalar 143 taga, kichik korxonalar 10,9 mingtaga oshgan.

Avgustda mazkur indeks 6 ta hududda iyul oyiga nisbatan oshgan. Sirdaryoda o‘sish 37,9 foiz, Qoraqalpog‘istonda 36,6 foiz bo‘lgan. Toshkent shahrida 7,6 foiz, Jizzaxda 7,2 foiz, Navoiyda 4,5 foiz va Xorazmda 2,9 foiz o‘sish qayd etilgan.

Qolgan 8 hududda indeks pasaygan. Buxoroda 19,5 foiz, Surxondaryoda 18,6 foiz, Qashqadaryoda 16,3 foiz, Namanganda 11,4 foiz va Farg‘onada 10,7 foiz kamayish kuzatilgan.

Banklararo to‘lov operatsiyalari soni avgustda 7 mln 185,9 mingtani tashkil etib, iyul oyiga nisbatan 6,2 foizga kamaygan. Yillik taqqoslashda esa 18,9 foiz o‘sish qayd etilgan.