Qirg‘iziston prezidenti Sadir Japarov mamlakatda ma’muriy-hududiy tizimni tubdan o‘zgartirish rejalari haqida ma’lum qildi.

Uning aytishicha, kelajakda viloyat va tumanlar bosqichma-bosqich tugatilib, ular o‘rniga 20 ta yirik okrug tashkil etilishi mumkin.

«Oxir-oqibat mamlakat 20 ta okrugga bo‘linadi. Bu jarayonga hali vaqt bor – taxminan 3–4 yil», – dedi davlat rahbari.

Japarovning ta’kidlashicha, islohot birdaniga joriy etilmaydi. Avvalo, bir okrug pilot loyiha sifatida tashkil etiladi va 2–3 yil davomida uning samaradorligi sinovdan o‘tkaziladi.

Asosiy mezon – ushbu hududning davlat dotatsiyasidan chiqib, mustaqil iqtisodiy faoliyat yuritish imkoniyati hisoblanadi. Agar pilot loyiha o‘zini oqlasa, ma’muriy tuzilma to‘liq qayta ko‘rib chiqiladi.

Ma’lumot uchun, so‘nggi ikki yil davomida Qirg‘izistonda ma’muriy-hududiy islohotlar doirasida qishloqlar soni 452 tadan 231 taga qisqartirilgan.

Mutaxassislar fikricha, mazkur islohot davlat boshqaruvini optimallashtirish va mahalliy budjetlarni mustaqillashtirishga qaratilgan.