Roppa-rosa besh kundan so‘ng, ya’ni 2018-yilning 10-aprel kuni O‘zbekiston blogerlari chempionatiga start beriladi. «Xabar.uz» axborot-tahliliy portali hamda O‘zbekiston mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi tomonidan hamkorlikda tashkil etilayotgan Blogerlar chempionatining mukofot jamg‘armasi bugunga kelib 60 million so‘mdan oshib ketdi.

Shundan 46 millioni 1,2,3-o‘rin sohiblariga atalgan bo‘lsa, qolgani o‘ndan ziyod nominatsiyalarning g‘oliblariga qimmatbaho sovg‘a shaklida topshiriladi:

1-o‘rin (1 ta): 15 million so‘m.

2-o‘rin (2 ta): har biriga 8 million so‘mdan.

3-o‘rin (3 ta): har biriga 5 million so‘mdan.

Tanlov 3 bosqichda o‘tkaziladi. 

Birinchi bosqichga arizalar 10–30-aprel oralig‘ida qabul qilinadi. Ishtirokchilar tanlov uchun maxsus tashkil qilingan platforma orqali ro‘yxatdan o‘tishlari lozim. Birinchi bosqich uchun 2017-yil 10-apreldan 2018-yil 30-aprelga qadar yozilgan blogpostlar taqdim etilishi mumkin. Blogpostlar 2018-yilning 30-aprel soat 23.59 gacha qabul qilinadi. Ushbu muddatdan kechikkan ishtirokchilarning blogpostlari tanlovga qabul qilinmaydi. Birinchi bosqich natijasiga ko‘ra 50 nafar bloger keyingi bosqichga yo‘l oladi.

Tanlovning ikkinchi bosqichida birinchi bosqichdan muvaffaqiyatli o‘tgan blogerlar 8–22-may kunlari yangi blogpost yozishi kerak. Ikkinchi bosqichda 8-maydan avval e’lon qilingan blogpostlar ko‘rib chiqilmaydi. Blogpostlarni 22-may kuni soat 23.59 gacha topshirish shart. Undan kechikkan ishtirokchilarning arizasi qabul qilinmaydi. Ikkinchi bosqich natijalari 27-may kuni e’lon qilinadi ushbu bosqichda eng yaxshi natija ko‘rsatgan 20 nafar bloger Final bosqichiga yo‘l oladi.

Mavzuga doir:
Mukofot jamg‘armasi 50 million so‘mdan ziyod Blogerlar chempionatiga start berilmoqda

Tanlovning final bosqichida ikkinchi bosqichdan muvaffaqiyatli o‘tgan 20 nafar bloger 28-may — 6-iyun kunlari yangi blogpost yozishi shart. Finalda 28-maydan avval e’lon qilingan blogpostlar ko‘rib chiqilmaydi. Blogpostlar topshirishning eng so‘nggi muddati 6 iyun soat 23.59 hisoblanadi. Undan kechikkan ishtirokchilarning arizasi qabul qilinmaydi. Final bosqichiga taqdim etilgan ishlar uchun 10-iyungacha ovoz beriladi. Chempionatning yakuniy natijalari 14-iyun kuni e’lon qilinadi.

Blogerlar chempionatining shartlari, qoidalari, ijodiy ishlarga qo‘yiladigan talablar va boshqa ma’lumotlarni tez orada ma’lum qilamiz! 

Eslatib o‘tamiz, Blogerlar chempionati o‘zbek tilida blog yurituvchi blogerlarni rag‘batlantirish, blogerlar tomonidan yozilgan fikrlarini keng jamoatchilikka yetkazishda ko‘maklashish, jamiyatdagi turli muammolarni muhokama qilish va bu orqali jamoatchilik fikrini shakllantirish, O‘zbekistonning xalqaro maydondagi imiji va nufuzini yuksaltirish, tashkilotlar hamda blogerlar o‘rtasida uzviy aloqalarni yo‘lga qo‘yish, o‘zbek blogerlari o‘rtasida ijodiy va do‘stona muhitni shakllantirish, internet tarmog‘ida o‘zbek tilidagi foydali resurslarni boyitish maqsadida tashkil etilmoqda.

Hozircha changib qolgan bloglaringizni tartibga keltirib, musobaqaga shaylanavering! Bu galgi chempionat avvalgilaridan mutlaqo boshqacha ruhda o‘tishi uchun qo‘ldan kelgan hamma ishni qilayapmiz. Avvalgilaridan farqli ravishda mazkur chempionatda g‘olib va sovrindor bo‘lish imkoniyati ancha yuqori. 

Xullas, oldinda bizni o‘ta qizg‘in o‘tishi kutilayotgan tanlov kutib turibdi. Siz ham Blogerlar chempionatida ishtirok etib, g‘olib bo‘lishingiz mumkin. Shunday ekan, o‘z iqtidoringiz va omadingizni sinab ko‘rishdan tortinmang! Dadilroq bo‘ling!