Shu yilning 12-aprelida O‘zbekiston blogerlari chempionatiga start berilgan edi. O‘zbekiston mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi tashabbusi bilan bir qator vazirlik va idoralar bilan hamkorlikda tashkil etilayotgan chempionat o‘zining qizg‘in pallasiga kirib ulgurdi.

Maxsus platformada bo‘lib o‘tayotgan chempionatga shu paytgacha qariyb ikki yuzta ijodiy ish kelib tushgan bo‘lsa, ularga o‘quvchilar tomonidan olti yuzdan ortiq izoh yozib qoldirilgan.

Mavzuga doir:
Qo‘llanma: Blogerlar chempionatida qanday ishtirok etish mumkin?

Chempionatning 1-bosqichi 30 aprelda yakunlanishi kerak edi. Biroq ko‘plab yurtdoshlarimizdan ushbu tadbir haqida yaqinda xabar topishgani, unda qatnashish istagida ekanliklari aytib, ijodiy ishlarni qabul qilish muddatini uzaytirish iltimos qilingan ko‘plab murojaatlar kelib tushdi. Jamoatchilikning talab va istaklarini inobatga olib hamda Chempionat nizomining 10.1-bandiga asosan Blogerlar chempionatining muddatini uzaytirishga qaror qildik.

Unga ko‘ra 1-bosqich uchun ijodiy ishlar 20-maygacha Qabul qilinadi. Qolgan bosqichlarning muddatlari ham o‘zgardi. Ikkinchi bosqich 22–31-mayda, final bosqichi esa 2–12-iyunda bo‘lib o‘tadi.

Mavzuga doir:
Mukofot jamg‘armasi 60 mln. so‘mlik Blogerlar chempionatida kimlar qatnashishi mumkin?

Eslatib o‘tamiz, Blogerlar chempionatining g‘oliblari quyidagi mukofotlar bilan taqdirlanishadi:

1-o‘rin (1 ta): 15 million so‘m.

2-o‘rin (2 ta): har biriga 8 million so‘mdan.

3-o‘rin (3 ta): har biriga 5 million so‘mdan.

Bundan tashqari, o‘ndan ziyod nominatsiyalar bo‘yicha ham g‘oliblar aniqlanadi. Nominatsiyalar g‘oliblari homiylar tomonidan esdalik sovg‘alari bilan taqdirlanadi.

Shuningdek, chempionatning bosh homiysi O‘zbekiston mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi «Tanlov kashfiyoti bo‘lgan bloger»ni alohida taqdirlaydi.

Mavzuga doir:
O‘zbekiston Xotin-qizlar qo‘mitasi va BMTTD qo‘shma loyihasi Blogerlar chempionati uchun 3 ta sovrin joriy qildi

Uch bosqichda o‘tkaziladigan chempionat ham, uni baholash ham onlayn shaklda, mutlaqo oshkora va shaffof bo‘ladi. Ishtirokchilarning sovrindor bo‘lishi uchun imkoniyatlar yanada kengaydi.

Xullas, oldinda bizni o‘ta qizg‘in o‘tishi kutilayotgan tanlov kutib turibdi. Siz ham Blogerlar chempionatida ishtirok etib, g‘olib bo‘lishingiz mumkin. Shunday ekan, o‘z iqtidoringiz va omadingizni sinab ko‘rishdan tortinmang! Dadilroq bo‘ling!