«ScienceAlert» ilmiy portali, olimlarning tadqiqotlari tahlili asosida, dunyodagi eng yoqimsiz hidlar «beshligi»ni tuzdi.

Birinchi o‘rin — vodorod sulfid. Astronomlarning aniqlashlaricha, nafaqat palag‘da tuxum, balki Uran sayyorasi ham shunday badbo‘y xususiyatga ega.

Ikkinchi o‘rin — durian tropik mevasi. Mutaxassislar bu meva tarkibida 44 xil faol hid taratuvchi birikma mavjudligini aniqlashgan, shuning uchun ham bu meva chirigan tuxumdan tortib karamelning xushbo‘y hidigacha o‘zida jamlagan.

Uchinchi o‘rin — «Arnold raffleziyasi» nomli parazit-gul. Bir paytning o‘zida chirish va baliq hidini o‘zidan chiqaruvchi bu gul Indoneziyaning Sumatra va Kalimantan orollarida o‘sadi. Hidi esa hasharotlarni jalb qiladi.

To‘rtinchi o‘rin — «Vyo Bulon» deb nomlanuvchi fransuz yumshoq pishlog‘i. Bu pishloq Fransiyaning Bulon-syur-Mer shahrida pasterizatsiyalanmagan, ya’ni issiq haroratda ishlov berilmagan sigir sutidan tayyorlanadi. Uning badbo‘yligi «elektron burun» yordamida aniqlandi.

Beshinchi o‘rin — kichik chumolixo‘r. Olimlarning fikricha, amerikaliklar juda cho‘chiydigan skunsning hidi chumolixo‘rnikiga solishtirilganda «fransuz atiri» bo‘lib qoladi. Sassiq hid mitti chumolixo‘rga yirtqichlar orasida jon saqlashda yordam beradi.