Xo‘sh, emlash tadbirlari qaysi vaksina bilan va birinchi qaysi hududlarda boshlanadi? Bu savolga Sanitariya-epidemiologik osoyishtalik va jamoat salomatligi xizmati rahbari o‘rinbosari Nurmat Atabekov mazkur masalaga izoh berib o‘tdi.

— Aholini koronavirusga qarshi ommaviy emlash ikkala turdagi vaksina bilan bir paytning o‘zida boshlanadi, — dedi mutaxassis. — Aholini koronavirusga qarshi ommaviy emlash quyidagi tartibda amalga oshirish maqsadga muvofiq deb topilgan:

Aprel oyida birinchi galda Qoraqalpog‘iston Respublikasi, viloyatlar markazlari, Toshkent shahri va boshqa katta shaharlarda ommaviy emlash tadbirlarini amalga oshirish;

May oyida tuman markazlari va kichik shaharlar aholisini ommaviy emlash tadbirlarini amalga oshirish;

Iyun oyida esa boshqa hududlarni ommaviy emlash tadbirlari bilan qamrab olish.

Mabodo may-iyun oylarida emlanishi rejalashtirilgan xavf osti guruhiga mansub aholi qatlamida koronavirusga qarshi ertaroq emlanishga hohish paydo bo‘lsa, u holda ular Qoraqalpog‘iston Respublikasi, viloyatlar markazlari, Toshkent shahri va boshqa katta shaharlarda joylashgan emlash punktlariga murojaat qilishlari va belgilangan kunda kelib emlanishlari mumkin bo‘ladi.