2018-yilning 10-aprel kuni start olishi rejalashtirilgan Blogerlar chempionati texnik tayyorgarlik ishlari mo‘ljaldagidan ko‘proq vaqt talab qilgani bois ijodiy ishlar 12-apreldan boshlab qabul qilinishi haqida xabar bergan edik. Nihoyat, chempionat o‘tkaziladigan onlayn platforma tayyor bo‘ldi. Chempionat uchun ilk blogpostlar ham kelib tushdi.

Hozircha chempionatda qatnashish istagida bo‘lganlar faqatgina matnli blogpostlarni yuborishlari mumkin. Tez orada video, audio va fotobloglarni ham platformaga joylash imkoni yaratiladi. Chempionatni belgilangan muddatda boshlash maqsadida texnik tayyorgarlikning ayrim jihatlarini yo‘l-yo‘lakay oxiriga yetkazishga qaror qildik.

Mavzuga doir:
O‘zbekiston Xotin-qizlar qo‘mitasi va BMTTD qo‘shma loyihasi Blogerlar chempionati uchun 3 ta sovrin joriy qildi

Shuningdek, hozircha ijodiy ishlarga baho berish ham imkonsiz. Uzog‘i bilan besh-olti kunda bu masalalarning hammasiga yechim topiladi, onlayn platforma to‘liq shay holatga keladi.

Eng muhimi, ungacha ishtirokchilar bemalol ijodiy ishlaringizni e’lon qilishi, o‘quvchilar esa ularni o‘qib, har bir blogpostga o‘z fikr-mulohazalarini yozib qoldirishlari mumkin. Asosiysi, aytilgan vaqtda boshlab oldik!

Mavzuga doir:
Iste’molchilar federatsiyasi Blogerlar chempionati uchun yana bir nominatsiya joriy qildi

Tez orada chempionatda qatnashish istagida bo‘lgan ishtirokchilarga oson bo‘lishi uchun ijodiy ishlarni maxsus platformaga joylashtirish tartibi skrinshotlar orqali tushuntirilgan yo‘riqnomani e’lon qilamiz.

Ijodiy ishlarga qo‘yiladigan talablar, ularni baholashda e’tiborga olinadigan mezonlar Blogerlar chempionatining nizomining 5-7-bandlarida belgilab qo‘yilgan. Chempionatga doir boshqa xabarlarimiz bilan maxsus «Blogerlar chempionati» tegi orqali tez va oson tanishishingiz mumkin.

Eslatib o‘tamiz, Blogerlar chempionati uch bosqichda bo‘lib o‘tadi. Birinchi bosqich 12-apreldan start olsa, final bosqichi 10-iyun kuni yakunlanadi. G‘olib va sovrindorlar 14-iyun — Xalqaro blogerlar kunida tantanali ravishda taqdirlanadi. Asosiy mukofotlardan tashqari o‘ndan ziyod nominatsiyalar bo‘yicha ham g‘oliblar taqdirlanadi.