2018-yilning 22-iyun kuni O‘zbekiston Respublikasi Vazirlar Mahkamasining «Jismoniy shaxslar tomonidan O‘zbekiston Respublikasiga tovarlarni olib o‘tish tartibini takomillashtirishga doir qo‘shimcha chora-tadbirlar to‘g‘risida»gi qarori qabul qilindi.

Qarorga muvofiq, shu yilning 1-iyulidan boshlab qo‘shni davlatlardan bojxona orqali olib kelinayotgan tovarlarning miqdori qisqardi hamda chegaralandi. Bu haqda Davlat bojxona qo‘mitasi rasmiy saytida xabar berildi.

Xabarda aytilishicha, O‘zbekiston Respublikasi Bojxona kodeksi va O‘zbekiston Respublikasi Prezidentining «Jismoniy shaxslar tomonidan bojxona chegarasi orqali tovarlarni olib o‘tishni yanada tartibga solish chora-tadbirlari to‘g‘risida»gi 2018-yil 6-fevraldagi qaroriga muvofiq, shuningdek, qonunga itoatkor fuqarolar va ishlab chiqaruvchi korxonalarning murojaatlarini inobatga olgan holda, respublikamizning iqtisodiy manfaatlarini himoya qilish, mahalliy ishlab chiqaruvchilarni qo‘llab-quvvatlash, berilgan imtiyozlarni suiste’mol qilinishining oldini olish hamda jismoniy shaxslar tomonidan O‘zbekiston Respublikasi Davlat chegarasining avtoyo‘l (yo‘lovchi), temir yo‘l va daryo o‘tkazish punktlari orqali tovarlarni olib o‘tish tartibini yanada takomillashtirish maqsadida shunday qarorga kelingan.

Qaror bilan jismoniy shaxslar tomonidan O‘zbekiston Respublikasi Davlat chegarasining avtoyo‘l (yo‘lovchi), temir yo‘l va daryo o‘tkazish punktlari orqali bojxona to‘lovlari undirilmaydigan ayrim tovarlarni olib o‘tishning miqdoriy normalari tasdiqlandi.

Ro‘yxatdan asosan 20 turdagi maishiy texnika buyumlari va ofis texnikalari joy olgan bo‘lib, endilikda ularni 1 kalendar oyida chegarani birinchi marotaba kesib o‘tayotganda faqat 1 donadan olib o‘tilishi mumkin.

Shuningdek, ro‘yxatda boshqa turdagi tovarlar uchun ham normalar belgilandi. Ya’ni, endilikda har kuni olib o‘tilayotgan har bir nomdagi tovardan 2 kg.gacha ruxsat etiladi. Ammo, mazkur tovarlarning umumiy og‘irligi 10 kg.dan oshmasligi kerak.

Unutmaslik kerakki, ushbu tovarlar sirasiga O‘zbekiston Respublikasi Prezidentining «Jismoniy shaxslar tomonidan bojxona chegarasi orqali tovarlarni olib o‘tishni yanada tartibga solish chora-tadbirlari to‘g‘risida» 2018 yil 6 fevraldagi PQ-3512 son qarori 1-ilovasida keltirilgan tovarlar kirmaydi.

Ushbu ilovada alkogol mahsulotlari, shu jumladan pivo – 2 litrgacha, barcha turdagi tamaki mahsulotlari – 10 qutigacha, atir va atirsimon suyuqliklar – 3 donagacha, qimmatbaho metall va qimmatbaho toshlardan yasalgan zargarlik buyumlari – 65 gr.gacha bojxona to‘lovlarisiz olib kirishga ruxsat etilgan.

Olib o‘tilayotgan tovarlar qiymati respublikaga jismoniy shaxslar tomonidan piyoda, avtomobilda, temir yo‘l yoki daryo o‘tkazish punktlari orqali tovarlarni bojxona to‘lovlari undirmasdan olib o‘tishning cheklagan me’yorlaridan oshmasligi kerak.

Mazkur me’yorlar O‘zbekiston Respublikasi Prezidentining «Jismoniy shaxslar tomonidan bojxona chegarasi orqali tovarlarni olib o‘tishni yanada tartibga solish chora-tadbirlari to‘g‘risida» 2018-yil 6-fevraldagi qarorida belgilangan bo‘lib, unga ko‘ra O‘zbekiston Respublikasi Davlat chegarasidagi temir yo‘l va daryo o‘tkazish punktlari orqali bojxona chegarasini kesib o‘tganda – 1000 AQSh dollari miqdorida hamda avtomobil yo‘li (piyodalar yo‘li) o‘tkazish punktlari orqali bojxona chegarasini kesib o‘tganda – 300 AQSh dollari miqdoridagi tovarlarni bojxona to‘lovlarisiz olib kirishga ruxsat etilgan.

Unutmang, tovarlarni bojxona to‘lovlari to‘lamasdan olib o‘tishning miqdoriy normalari jismoniy shaxs O‘zbekiston Respublikasi davlat chegarasini chegara o‘tkazish punktidan belgilangan davrda birinchi marta o‘tishida qo‘llaniladi. Bunda bojxonachilar chegara xizmatlari organlari tomonidan jismoniy shaxsning pasportiga qo‘yiladigan belgidagi sanaga asoslanishadi.

Misol: Jismoniy shaxs masalan iyun oyi davomida chegarani piyoda ravishda birinchi marta 5-iyun sanasida kesib o‘tsa, demak ayni shu o‘tishida unga nisbatan ro‘yxatdagi 1-20 qatorlarda ko‘rsatilgan tovarlarni bojxona to‘lovlari to‘lamasdan olib o‘tishning miqdoriy normalari qo‘llaniladi. Ya’ni, mana shu birinchi o‘tishda 300 AQSh dollarigacha bo‘lgan qiymatdagi tovarlarni bojsiz olib kirishi mumkin. Jismoniy shaxsning iyun oyi davomida chegarani keyingi kesib o‘tgan holatlarida ushbu normalar tadbiq etilmaydi. Shuningdek, jismoniy shaxs 1 kalendar oy davomida 300 AQSh dollaridagi meyo‘rdan bo‘lib-bo‘lib foydalana olmaydi. Shuning bilan u bu imkoniyatdan keyingi kalendar oyida foydalana oladi.

Ro‘yxatda qayd etilgan har qanday tovar belgilangan norma va davriylikdan ortiq olib o‘tilganda o‘rnatilgan tartibda bojxona to‘lovlari undiriladi.

Davlat bojxona qo‘mitasi axborot xizmati xabariga ko‘ra, mazkur normalar 2018 yilning 1 iyulidan boshlab, kuchga kiradi.

Qarorning to‘liq matni bilan Lex.uz - O‘zbekiston Respublikasi qonun hujjatlari ma’lumotlari milliy bazasi orqali tanishishingiz mumkin.

Jismoniy shaxslar tomonidan O‘zbekiston Respublikasi Davlat chegarasining avtoyo‘l (yo‘lovchi), temir yo‘l va daryo o‘tkazish punktlari orqali bojxona to‘lovlari undirilmaydigan ayrim tovarlarni olib o‘tishning miqdoriy normalari bilan quyidagi jadvalda o‘z aksini topgan.