Huawei kompaniyasi va Ucell mobil operatori tayanch stansiyalarning energiya iste’molini optimallashtirish uchun intellektual PowerStar tizimini ishga tushirganini e’lon qildi. Mazkur loyiha Ucell kompaniyasining energiya samaradorligi yuqori va ekologik barqaror telekommunikatsiya infratuzilmasini rivojlantirishga xizmat qiladi.

Telekommunikatsiya uskunalari ishlab chiqaruvchisi Huawei va O‘zbekistonning yirik mobil operatorlaridan biri bo‘lgan Ucell kompaniyasi operator tarmoqlarida intellektual energiya tejash tizimi – PowerStar ishga tushirilganini e’lon qildi. Ushbu qadam Ucell kompaniyasining O‘zbekistonda yanada barqaror va energiya samaradorligi yuqori telekommunikatsiya infratuzilmasini yaratish yo‘lidagi sa’y-harakatlarini yanada mustahkamlaydi.

PowerStar real vaqt rejimida tarmoq yuklamasini tahlil qiladi va radio tarmoq ish parametrlarini moslashtiradi. Abonentlar faolligi past bo‘lgan davrlarda tizim uskunalarning bir qismini energiya tejash rejimiga o‘tkazadi. Tarmoq texnologiyasi va konfiguratsiyasiga qarab, bu jarayon tashuvchi chastotalarni dinamik ravishda o‘chirish, uzatish quvvatini kamaytirish, radio modullar ishini optimallashtirish, shuningdek, ortiqcha resurslardan vaqtincha foydalanishni cheklashni o‘z ichiga olishi mumkin. PowerStar algoritmlari qamrov sifati, tarmoq yuklamasi va foydalanuvchi tajribasiga qo‘yiladigan talablarni hisobga oladi. Bu esa aloqa sifati va xizmatlarning mavjudligini saqlagan holda energiya iste’molini kamaytirish imkonini beradi. Yuklama belgilangan chegaraga yetganda, tizim avtomatik ravishda tarmoqni energiya tejash rejimidan chiqaradi va uning barqaror hamda uzluksiz ishlashini ta’minlaydi.

PowerStar tizimini ishga tushirishning asosiy natijasi – tarmoq energiya sarfining sezilarli darajada kamayishi bo‘ldi. 2026 yil may oyida Toshkentdagi 5G tarmog‘ida PowerStar tizimining faollashtirilishi energiya iste’molini 15 foizdan ortiq kamaytirish imkonini berdi. Umuman olganda, Ucell tarmog‘ida Huawei uskunalari asosida energiya tejamkorligi o‘rtacha 4 foizga yetmoqda. Mazkur funksionallik butun tarmoq bo‘ylab kengaytirilganda, har oyda qariyb 200 ming kVt·soat elektr energiyasini tejash imkoniyati yaratiladi. Bu esa elektr energiyasi xarajatlarini kamaytirish, SO₂ chiqindilarini qisqartirish va atrof-muhitga tushadigan yuklamani kamaytirishga bevosita xizmat qiladi.

“Yashil AKT yechimlarini tadqiq qilish va ishlab chiqish kompaniyamizning strategik ustuvor yo‘nalishlaridan biridir. "Yashil" rivojlanish barcha sohalar uchun aniq yo‘nalishga aylanayotgan bir paytda, raqamlashtirish va dekarbonizatsiya jarayonlarining uyg‘unlashuvi barqaror kelajak sari yaqinlashishimizga yordam beradi. Telekom operatorlari uchun energiya samaradorligi yuqori bo‘lgan yechimlarni taqdim etish orqali biz telekommunikatsiya sohasiga chiqindilarni kamaytirish va shu bilan birga operatsion samaradorlikni oshirishda ko‘maklashmoqdamiz. Barqaror aloqa tarmoqlarini birgalikda yaratish esa atrof-muhitga tushadigan yuklamani kamaytirishga xizmat qiladi”, — dedi Huawei kompaniyasining O‘zbekistondagi direktori Tan Syaosyan.

“Texnologik yetakchilik strategiyamizga amal qilgan holda, Ucell nafaqat ilg‘or, balki energiya samaradorligi yuqori bo‘lgan texnologiyalarni joriy etish bo‘yicha loyihalarni amalga oshirishda davom etmoqda. PowerStar yechimi abonentlarimizga taqdim etilayotgan xizmatlar qiymatini yanada oshirish, shuningdek, butun O‘zbekiston bo‘ylab telekommunikatsiya tarmoqlarining barqarorligi va ekologik samaradorligini yaxshilash imkonini beradi”, — dedi Ucell bosh direktori Andrey Shishkovskiy.

PowerStar energiya samaradorligi yuqori va ekologik barqaror telekommunikatsiya tarmoqlarini rivojlantirish strategiyasining muhim elementlaridan biri bo‘lib, texnologik taraqqiyot va resurslardan mas’uliyatli foydalanish o‘rtasidagi muvozanatni ta’minlaydi. Loyihaning muvaffaqiyatli amalga oshirilishi mamlakatdagi aloqa operatorlarining barqaror va ekologik toza faoliyatini qo‘llab-quvvatlashga xizmat qiladi. Shuningdek, bu Ucell kompaniyasining abonentlari uchun aloqa sifatini oshirish maqsadida tarmoqlarni doimiy modernizatsiya qilish hamda O‘zbekistonda "yashil" tashabbuslarni qo‘llab-quvvatlashga intilayotganining navbatdagi tasdig‘idir.