Eronda milliy valyuta - rialning keskin pasayishi ortidan ommaviy ko‘cha noroziliklari davom etmoqda. DW nashrining xabar berishicha, dekabr oyi oxirida boshlangan norozilik namoyishlari 2022-yildan beri mamlakatdagi eng yirik norozilik harakatlariga aylandi. 

Erondagi inson huquqlari faollari tashkiloti va uning HRANA media loyihasi ma’lumotlariga ko‘ra, to‘qqiz kunlik norozilik namoyishlari davomida kamida 35 kishi halok bo‘lgan va yana 1200 dan ortiq kishi hibsga olingan. 

Inson huquqlari faollarining ma’lumotlariga ko‘ra, halok bo‘lganlar orasida 29 nafar namoyishchi, to‘rt nafar bola va ikkita xavfsizlik xodimi bor. 

Inson huquqlari faollarining ma’lumotlariga ko‘ra, norozilik namoyishlari Eronning 31 viloyatidan 27 tasini qamrab olgan kamida 88 ta shaharda bo‘lib o‘tgan. Muayyan vaqtda xavfsizlik kuchlari namoyishchilarga, ayniqsa kichik shaharlarda, qarshi qattiq choralar ko‘rishni boshladi. 

HRANA ma’lumotlariga ko‘ra, bu chora Mashhad va Tehron kabi yirik shaharlarda norozilik namoyishlarining yangi to‘lqiniga olib keldi. Mamlakat bo‘ylab kamida 17 ta oliy ta’lim muassasasining talabalari norozilik namoyishlariga qo‘shilishdi. Bunga javoban xavfsizlik kuchlari universitet kampuslarida to‘g‘ridan-to‘g‘ri reydlar o‘tkazishni boshladi. 

5-yanvar kuni Eron Islom Respublikasi sud tizimi vakili norozilik namoyishlari paytida hibsga olinganlarga hech qanday yumshoq munosabatda bo‘lmasligini aytdi. 

Ta’kidlanishicha, hozirgi norozilik namoyishlari 2022 yilgi voqealardan beri eng yirik norozilik namoyishi bo‘lib, o‘shanda noroziliklar 22 yoshli Mahsa Aminining axloq politsiyasi tomonidan hibsga olinganidan keyin vafot etishi ortidan boshlangan. 

Eronda ommaviy norozilik namoyishlari 28-dekabrdan beri davom etmoqda. OAV xabarlariga ko‘ra, ular Tehronning asosiy bozorida boshlangan, u yerda ko‘plab savdogarlar giperinflyasiya va narxlarning keskin ko‘tarilishiga qarshi norozilik sifatida do‘konlarini yopgan.