Moldova tashqi ishlar vazirligi mamlakatning Mustaqil Davlatlar Hamdo‘stligi (MDH) tarkibidan to‘liq chiqishi uchun qonuniy harakatlarni boshladi. Bu haqda Moldova milliy radiosi efirida tashqi siyosat idorasi rahbari Mixay Popshoy ma’lum qildi.

• Vazirning aytishicha, a’zolikni uzil-kesil tugatish uchun tashkilot asoslangan uchta asosiy hujjatni denonsatsiya qilish talab etiladi:
• MDHni tuzish to‘g‘risidagi ta’sis shartnomasi (1991-yil).
• Ushbu shartnoma bayonnomasi (1991-yil).
• MDH nizomi (1993-yil).

«Yuqoridagi hujjatlar bekor qilinishi bilan Moldova rasman MDH tarkibidan chiqadi va bu jarayon allaqachon boshlangan. Biz bu qarorni yaqinda qabul qildik», — dedi Popshoy.

Denonsatsiya to‘g‘risidagi hujjatlar yangi qonunchilik sessiyasi boshlanganidan keyin parlamentga ko‘rib chiqish uchun yuboriladi. Vazir barcha jarayonlar 2026-yil fevral oyining o‘rtalariga qadar yakunlanishi mumkin, dedi.

Rossiya Ukrainaga bostirib kirgan 2022-yildan buyon Moldova MDH yig‘ilishlarida ishtirok etmayapti.