АҚШда демократлар Трампнинг Канада билан чегарада эълон қилган миллий фавқулодда ҳолатини бекор қилиш бўйича овоз йиғиш ташаббусини кўрсатди. Қарор лойиҳаси 219 та овоз билан қабул қилинди (211 нафар қарши овоз берди).

Ушбу лойиҳада олти нафар республикачи ҳам демократлар билан бирга овоз берган. Бир нафар демократ эса аксинча, республикачиларни қўллаб-қувватлаган.

Трамп Канадага нисбатан жорий этилган тарифларни бекор қилишни қўллаб-қувватлаган олти нафар республикачи конгрессменни сайловда жазолаш билан таҳдид қилди.

«Агар Конгрессдаги бирор республикачи тарифларга қарши овоз берса, сайлов пайтида жиддий оқибатларга дуч келади. Бу праймериз сайловларига ҳам тегишли», – деб ёзади у Truth Social тармоғида.

Трампнинг айтишича, унинг тариф сиёсати туфайли АҚШнинг савдо тақчиллиги камайган ва молия бозорлари ўсган. У яна тарифлар миллий хавфсизликни мустаҳкамлаганини таъкидлади.

Қонун лойиҳаси Сенатга юборилган. Бироқ Трамп унга вето қўйиши ҳам мумкин.

Гап Трампнинг 2025 йил февраль ойида Канада ва Мексикадан келадиган товарларга нисбатан эълон қилган қўшимча 25 фоизли божи ҳақида бормоқда (жумладан, Канада энергетика маҳсулотларига эса 15 фоиз бож, -таҳр.).

Оқ уй бу чораларни ноқонуний миграция ва наркотиклар, хусусан фентанил оқимини тўхтатиш билан боғлаганди.

Бироқ тарифларга қарши чиққан айрим республикачиларнинг фикрича, Конгресс ташқи савдони тартибга солиш ваколатига эга ва фавқулодда ҳолат ваколатлари доимий савдо сиёсати воситасига айланмаслиги керак. Агар бу амалиёт одатий ҳолга айланса, келажакда бошқа президентлар ҳам шундай йўл тутиши мумкин.

Конгрессмен Жефф Ҳерд бу қарор Конституцияга асосланганини таъкидлаб, ҳокимият тармоқлари ўртасидаги мувозанат сақланиши кераклигини айтади.

Айрим конгрессменлар 2026 йил сайловларида қатнашмаслигини аллақачон маълум қилган. Шунинг учун Трампнинг таҳдиди барчага ҳам таъсир кўрсатмаслиги мумкин.

Шу билан бирга, бу масала республикачилар орасида ҳам тариф сиёсати бўйича ягона позиция йўқлигини кўрсатди.