Айрим экспертлар Қозоғистонда амалга оширилаётган парламент ислоҳотидан кўзланган мақсад давлат бошқаруви тизимида парламент спикери ваколатларини янада кучайтириш экани, Қосим-Жўмарт Тўқаев мазкур лавозимни ўзига ҳозирлаётгани ҳақидаги тахминни илгари сурмоқда.

Қозоғистон президенти Қосим-Жўмарт Тўқаев “Turkistan” газетасининг жорий йил 5 январь сонида чоп этилган интервьюсида ушбу иддаони рад этган.

“Бу – фантазия, холос. Бундай даъволар менинг сиёсий принципларимга зиддир. Мен Қозоғистон президентлик бошқарувига асосланган давлат эканини кўп бора айтганман. Оқўрдага келгунга қадар, 8 йил аввал “Кучли президент – нуфузли парламент – ҳисобдор ҳукумат” концепциясини илгари сурганман. Шахсий манфаат йўлида бутунбошли давлат тизимини ўзгартириш масъулиятсизликнинг ҳадди аълоси бўлур эди. Мен буни номақбул иш деб атайман.

Мамлакат учун муҳим ислоҳотлар умумхалқ референдумига қўйилади. Бу борада қандайдир яширин ният-мақсадга ўрин йўқ. Менинг позициям барчага маълум: cиёсий ислоҳотлар давом эттирилади. Узоқ муддатли режаларнинг бир қисми, одатдагидек, яқин муддатда эълон қилинади”, – деган Қозоғистон раҳбари.

Қ.Тўқаев 2026 йил Қозоғистон тақдирида муҳим йил бўлиши, мамлакатнинг узоқ йиллик тараққиёт векторини белгилаб берадиган ҳодисалар рўй беришини таъкидлаган. Жумладан, Конституцияни ислоҳ қилишга оид ишлар амалга оширилишини қайд этган.

Интервью мобайнида сиёсатчи ички ва ташқи сиёсатга оид кўплаб муҳим масалаларга ойдинлик киритган.