Эрон АҚШ томонидан ядровий материалларни мусодара қилиш эҳтимолидан хавотирланиб, қурол яратиш учун яқин даражада бойитилган уран захиралари сақланаётган объектларни қўшимча мустаҳкамлаган.

CNN манбаларга таяниб хабар беришича, сўнгги ҳафталарда Эрон бир қатор ерости туннелларини атайлаб портлатган ва кириш йўлларини миналаштирган.

Нашр маълумотларига кўра, бу чоралар тахминан ярим тонна юқори даражада бойитилган уранга етиб боришни анча қийинлаштирган. Энди ушбу материалларни олиб чиқиш учун катта ҳажмдаги қазиш ишлари ва миналардан тозалаш тадбирлари талаб этилади.

CNN суҳбатлашган манбаларнинг таъкидлашича, мазкур ҳолат Вашингтон ва Теҳрон ўртасида муҳокама қилинаётган эҳтимолий келишувни ҳам мураккаблаштириши мумкин. Аввалроқ АҚШ президенти Дональд Трамп Эроннинг бойитилган уранини мамлакатдан олиб чиқиш ёки йўқ қилиш масаласи музокараларнинг асосий шартларидан бири эканини айтган эди.

Маълумотларга кўра, халқаро ҳамжамият ушбу захираларнинг асосий қисми Исфаҳон ядровий мажмуасидаги қулаган туннелларда сақланаётганига ишонмоқда.

Эрон ташқи ишлар вазири Аббос Ароқчининг айтишича, бу захиралар 2025 йил июн ойида Исроил ва АҚШ зарбалари оқибатида вайрон бўлган ядровий объектлар вайроналари остида қолиб кетган.

Айни пайтда АҚШ ва Эрон ўртасида эҳтимолий келишув юзасидан музокаралар давом этмоқда. Бироқ келишув шартлари бўйича томонлар ҳозирча турлича баёнотлар бермоқда.