Telegram мессенжери асосчиси Павел Дуров Париждаги Лувр музейида юз берган ўғирликка муносабат билдириб, бу ҳолатни Франция давлатининг инқирозга дуч келаётганидан дарак сифатида баҳолади.

«Луврда содир бўлган ўғирлик мен учун умуман ажабланарли эмас. Бу — бир пайтлар буюк бўлган мамлакатнинг кечираётган таназзулининг яна бир қайғули белгиси. Бу ерда ҳукумат ҳақиқий муаммоларга қарши курашиш ўрнига, одамларни уйдирма хавф-хатарлар билан чалғитиш санъатига кўпроқ эътибор қаратяпти», – деб ёзади Дуров.

Дуров ушбу воқеани фақат маданий талафот эмас, балки Франция давлат тизимларидаги заифлик, хавфсизликка эътибор сусайгани ва жамиятдаги ишонч пасайиши ортидан келган оқибат сифатида кўрсатади.

У, шунингдек, Луврда ўғирланган буюмларни сотиб олишини айтиб, истеҳзо ҳам қилган.

«Ўғирланган зебу-зийнатларни сотиб олишга ва уларни Луврга қайтариб беришга тайёрман. Албатта, мен Абу-Дабидаги Луврни назарда тутяпман. Чунки у ердан ҳеч ким ҳеч нарса ўғирлай олмайди», – дейди Дуров.

Эслатиб ўтамиз, 19 октябрь куни номаълум шахслар Париждаги Лувр музейига ишчи қиёфасида кириб, Апполон галереясидан Наполеон даврига тегишли қимматбаҳо зеб-зийнатлардан ва 9 та тарихий экспонатни ўғирлаб кетишган.