Фаластинликлар Исроил ҳаво ҳужумларида 10 дан ортиқ Ғазо аҳолиси ҳалок бўлганини маълум қилди. 

Якшанба куни Исроил Ғазо секторига ҳаво ҳужумларини уюштирди ва камида 11 фаластинликни ўлдирди, деди Фаластин расмийлари. Исроил ҳарбийлари бу ҳужумларни ҲАМАСнинг сулҳни бузганлиги учун қасос сифатида таърифладилар, деб хабар беради Reuters. 

Фаластинлик тиббиёт ходимларининг хабар беришича, чодир лагерьига қилинган ҳаво ҳужумида тўрт киши, Ғазо секторининг жанубидаги Хон Юнис шаҳридаги ҳужумда яна беш киши ҳалок бўлган ва Ғазо секторининг шимолий қисмида яна бир киши отиб ўлдирилган. Ҳаво ҳужумлари шунингдек, Ғазо шаҳридаги Исломий Жиҳод қўмондонига қаратилган. 

ҲАМАС вакили Ҳазем Қассем буни АҚШ президенти Доналд Трампнинг Ғазо секторининг келажагини муҳокама қилиш режалаштирилган Тинчлик Кенгашининг биринчи йиғилишидан бир неча кун олдин жиддий сулҳни бузиш деб атади. 

Ўз навбатида, Исроил ҳарбий амалдори ҳужумларни "аниқ" ва халқаро ҳуқуққа мувофиқ деб атади ва Ҳамас октябр ойидаги сулҳ келишувини бир неча бор бузганини айтди. 

Уруш 2023 йил 7 октябрда ҲАМАСнинг Исроил жанубига ҳужуми билан бошланди, натижада 1200 дан ортиқ одам ҳалок бўлди. Ҳамас назоратидаги Соғлиқни сақлаш вазирлиги маълумотларига кўра, Ғазо секторида 72 мингдан ортиқ одам ҳалок бўлган.