Германия Бундесвери таркибидаги 15 нафар ҳарбий хизматчи Гренландияни режалаштирилган муддатдан олдин тарк этди. Улар орол пойтахти Нуукдан Icelandair авиакомпанияси рейси билан учиб кетган. Бу ҳақда BILD нашри хабар берди.

Маълум қилинишича, Германия ҳарбийларига қайтиш ҳақидаги буйруқ Берлиндан эрта тонгда келиб тушган. Шу сабабли барча режалаштирилган учрашув ва тадбирлар зудлик билан бекор қилинган. Миссия раҳбари Штефан Паули бир кун олдин Германия раҳбариятидан кейинги қадамлар бўйича қарор кутилaётганини айтган эди.

Дастлаб ҳарбийларнинг кутилмаган қарори сабаблари расман очиқланмади. Айрим тахминларга кўра, бу қарор Гренландия атрофидаги геосиёсий вазиятнинг кескинлашуви ва АҚШ президенти Дональд Трамп томонидан билдирилган янги савдо таҳдидлари билан боғлиқ бўлиши мумкин. Бироқ бу версиялар расмий тасдиқ олмаган.

Шу билан бирга, Германия Мудофаа вазирлиги кейинчалик тушунтириш бериб, Бундесвер ҳарбийлари Гренландияни режага мувофиқ тарк этганини маълум қилди. Вазирликка кўра, қайтиш 15–17 январь кунларига мўлжалланган бўлиб, уни 18 январгача узайтириш режалаштирилган. Аммо оролдаги ёмон об-ҳаво шароити сабабли сафар узайтирилмаган.

Бундесвер миссияни муваффақиятли деб баҳолади. Подполковник Петер Милевчук Нуук аэропортидан туриб, Дания ҳарбийлари билан ҳамкорлик «энг юқори даражада конструктив» бўлганини таъкидлади.

Маълумот учун, Германия ҳарбийлари Гренландияга НАТО доирасида, Дания таклифи билан бир неча кун олдин етиб келган эди.

Эслатиб ўтамиз, кеча Трамп Гренландия масаласида ўзининг «The Social Truth» тармоқ саҳифасида яна пост жойлаштирди.

«НАТО Данияга 20 йилдан бери «Гренландиядан Россия таҳдидини қайтаришингиз керак», деб айтиб келмоқда. Афсуски, Дания бу борада ҳеч нарса қила олмади. Энди вақт келди ва бу амалга ошади!» – деб ёзади Трамп.