Германия федерал таълим вазири Беттина Штарк-Ватцингер Киевга ташрифи чоғи Украинага таълим бўйича кўмак давом эттирилишини маълум қилди.

Олмон вазири уруш туфайли вайрон бўлган мамлакатни қайта тиклашда малакали кадрларга эҳтиёж кучли бўлиши, бу борада мактаблар муҳим ўрин тутишига эътибор қаратган. Шунга кўра, у малакали ишчи-ходимларни тайёрлаш бўйича ҳам кўмак кўрсатилишига ваъда берган.

«Кўриб турибмизки, Украинани қайта тиклаш эртанинг иши эмас, бу жараён аллақачон бошланган. Биз малакали ишчи-ходимлар тайёрлашга ҳам кўмак бериш ниятидамиз», – деган Германия федерал таълим вазири.

Айни пайтда Германиядаги мактабларда 203 минг нафар украиналик бола ўқимоқда. Олмон олий ўқув муассасаларида таҳсил олаётган украиналик талабалар сони эса 7000 нафарни ташкил этади.

Жорий йил 18 январь куни Украина етакчиси Владимир Зеленский билан телефон орқали мулоқот қилган Германия президенти Франк-Вальтер Штайнмайер Россия ҳарбий босқинига қарши курашда кўмак давом эттирилишини таъкидлаган.

«Биз Украинани сиёсий, гуманитар, молиявий ва ҳарбий жиҳатдан имконимиз борича қўллаб-қувватлаймиз ва айни чоқда, саъй-ҳаракатларимизни иттифоқчиларимиз билан мувофиқлаштирамиз», – деган Франк-Вальтер Штайнмайер.

Расмий Берлин Украина босқини бошланганидан буён мазлум давлатга турли йўналишларда кўмак кўрсатиб келмоқда. Масалан, жорий йил январь ойида олмон ҳукумати «Леопард» танкларини Киевга топширишга розилик берган эди.

Маълумотларга қараганда, уруш бошланганидан буён Германия ҳукумати икки томонлама кўмак доирасида Украинага 12,5 миллиард евро ажратган. Бу маблағ гуманитар кўмак ва уруш оқибатларини бартараф этишга йўналтирилган.

Германия канцлери Олаф Шольц БМТ Бош ассамблеясидаги маърузасида ҳам Россиянинг Украинага босқинини кескин қоралаган, Кремлни империализм сиёсати юритишда айблаган эди.

Сиёсатчининг таъкидлашича, тиш-тирноғига қадар қуролланган, ядро аслаҳасига эга, БМТ Хавфсизлик кенгашининг доимий аъзо бўлган мамлакат чегараларни зўравонлик йўли билан ўзгартиришга уринаётган бир пайтда мутараққий дунё қўл қовуштириб ўтириши ярамайди. Шунга кўра у халқаро ҳамжамиятни БМТнинг низом ва қадриятларини ҳимоя қилишга даъват этган.