Дания ташқи ишлар вазири Ларс Локке Расмуссен АҚШ президенти Доналд Трампни Гренландиядан «қўлини тортишга» чақирди ва Американинг оролга ҳужуми бутун қиролликка ҳужум сифатида қабул қилинишини таъкидлади. Бу ҳақда Bloomberg хабар берди. 

Расмуссен Дания АҚШнинг Гренландияни топшириш талабларига бўйсунмаслигини айтди ва Трампнинг позициясини тушунтириш учун АҚШ элчисини чақирди. 

«Қиролликнинг бир қисмига ҳужум бутун қиролликка ҳужумдир», деди Расмуссен маҳаллий ТВ2 телеканалига берган интервьюсида ва Гренландия «НАТО ҳимояси остида» эканлигини таъкидлади. 

Гренландия бош вазири Йенс-Фредерик Нилсен ҳам оролни АҚШГА топшириш имкониятини рад этди. 

«Гренландия гренландияликларга тегишли ва унинг ҳудудий яхлитлиги ҳурмат қилиниши керак», деб ёзди Нилсен Facebookʼдаги постида. 

Эслатиб ўтамиз, 22 декабр куни АҚШ президенти Доналд Трамп республикачи Луизиана губернатори Жефф Ландрини Гренландия бўйича махсус элчиси этиб тайинлаганини эълон қилди. Ландри Трампга уни Гренландия бўйича махсус элчи этиб тайинлагани учун миннатдорчилик билдирди ва мамлакатнинг оролни сотиб олиш ниятини тасдиқлади. Кейинчалик Трамп АҚШга Гренландия ресурсларни назорат қилиш учун эмас, балки миллий хавфсизлик учун кераклигини тушунтирди. Шу билан бирга, Женс-Фредерик Нилсен АҚШнинг оролни эгаллаб олиш истагидан афсусда эканлигини билдирди.