Америкалик журналист Такер Карлсон Қатар ва Саудия Арабистонида портлашлар уюштиришни режалаштирган “Моссад” агентлари қўлга олинганини маълум қилди. Бу ҳақда у “The Tucker Carlson Show” деб аталган дастурида гапирган.  

“Эрон ҳужумига учраган Форс кўрфазининг икки мамлакатида портлашлар уюштириш исроилликларга нега керак бўлди?” дея савол қўйган Такер Карлсон ва ўзи бу масалага ойдинлик киритган. 

Унинг фикрича, Исроил Форс кўрфази давлатларини рақиб деб билади ва шу боис Эрон билан бирга Қатар, БАА, Саудия Арабистони, Баҳрайн, Ўмон ва Кувайтга зарар етказишга уринмоқда.

Такер Карлсонга кўра, Исроил портлашлар орқали минтақада беқарорлик ва тартибсизлик авж олиши ва бу ҳаракат учун жавобгарлик Эрон зиммасига тушишини кўзлаган. 

Журналист зикр этилган давлатлар минтақавий олишувда фронтнинг айни бир томонида эканини шубҳа остига олган.

Такер Карлсон Саудия ва Қатарда Исроил жосуслари қўлга олингани халқаро матбуотда кенг ёритилмаганини ҳам эслатиб ўтган. 

Америкалик журналист томонидан тарқатилган бу хабарга минтақа давлатлари расман муносабат билдирмаган.

Хабарингиз бор, 28 февралдан буён АҚШ ҳамда Исроил Эронга қарши кенг кўламли зарбалар бермоқда.

Эрон бунга жавобан Қатар, БАА, Баҳрайн ва Саудия Арабистонидаги АҚШ объектларига ҳужум қилди. 

Аввал хабар берганимиздек, куни кеча Эрон матбуоти ҳам Исроилни Saudi Aramco нефть объектларига “сохта байроқ” остида ҳужум қилишда айблаган эди. Теҳрон томонига кўра, мазкур ҳаракатдан кўзланган мақсад минтақадаги давлатлар эътиборини Исроилнинг Эрон ҳудудидаги фуқаровий объектларга қилинган зарбаларидан чалғитишдир.

Бугун эса Қатар давлат хавфсизлик хизмати Эроннинг Ислом инқилоби қўриқчилари корпуси билан алоқадорликда гумон қилинган иккита гуруҳ аъзоларини ҳибсга олгани маълум бўлди. Қатар давлат ахборот агентлигига кўра, қўлга олинганлар Қатардаги ҳарбий объектлар ҳақида маълумот тўплаш ва дронлардан фойдаланган ҳолда қўпорувчилик ҳаракатларини амалга оширишга тайёргарлик кўрган.

Ҳарбий ҳаракатлар кетаётган паллада бир-бирига зид ахборотлар тарқалиши табиий ва томонларнинг қай бири ҳаққоний маълумот бераётганини аниқлаш мушкул.

Дарвоқе, зиддиятли шахс деб кўриладиган журналист Такер Карлсон ўтган йили президент Жо Байден маъмурияти Россия раҳбари Владимир Путинга қарши суиқасд уюштиришга урингани ҳақида шов-шувли баёнот берганди.