Жанубий Корея прокуратураси собиқ президент Юн Сок Ёлни 2024 йил декабрида мамлакатда ҳарбий ҳолат жорий этишга уриниш билан боғлиқ ишда айбдор деб топилса, унга ўлим жазоси тайинлашни сўради. Бу ҳақда Сеул судида ўтган суд мажлисида маълум қилинди.

Юн Сок Ёлга қўйилган асосий айблов — исёнга раҳбарлик қилиш. Жанубий Корея қонунчилигига кўра, бундай ишларда прокуратура суддан ёки ўлим жазосини, ёки умрбод қамоқ жазосини сўрашга мажбур.

2024 йил декабр ойи бошида Юн Сок Ёл мамлакатда ҳарбий ҳолат жорий этган, аммо парламент бу қарорни бир неча соат ичида бекор қилган эди. Шундан сўнг президентга нисбатан импичмент эълон қилинган, у ҳибсга олинган ва суд олдига олиб чиқилган.

Юн Сок Ёл барча айбловларни рад этмоқда. Унинг таъкидлашича, ҳарбий ҳолат жорий этиш рамзий характерга эга бўлиб, мухолифат ҳаракатларига жамоатчилик эътиборини қаратишни мақсад қилган.

Прокурорлар эса, гарчи воқеалар давомида қурбонлар бўлмаган бўлса-да, президентнинг ниятлари зўравонликка олиб келиши мумкин бўлганини таъкидламоқда. Судда айрим ҳарбий раҳбарлар Юн қонун чиқарувчиларни ҳибсга олиш бўйича буйруқлар берганини билдирган. Шунингдек, ҳарбий ҳолат режаси муаллифларидан бири томонидан тайёрланган ҳужжатда юзлаб шахсларни, жумладан журналистлар ва депутатларни «йўқ қилиш» таклиф этилгани айтилди.

Жанубий Кореяда сўнгги қарийб 30 йил давомида ўлим жазоси ижро этилмаган. 1996 йилда ҳарбий тўнтариш орқали ҳокимиятга келган собиқ диктатор Чон Ду Хван ўлим жазосига ҳукм қилинган, аммо кейинчалик жазо умрбод қамоққа алмаштирилган эди.

Юн Сок Ёл иши собиқ мудофаа вазири Ким Ён Хён ва собиқ полиция раҳбари Чо Джи Хо ишлари билан бирлаштирилган. Суд ҳукми 2026 йил февраль ойида эълон қилиниши кутилмоқда.

2025 йил июнь ойида Жанубий Кореяда ўтказилган навбатдан ташқари сайловларда Ли Чжэ Мён янги президент этиб сайланган. Шу билан бирга, Юн Сок Ёл ҳали ҳам ўнг қанот сиёсий доираларда маълум миқдорда тарафдорларга эга.