Жанубий Кореянинг Сеул марказий туман суди мамлакатнинг собиқ бош вазири Хан Док Суни 2024 йил декабрь ойида мамлакатда ҳарбий ҳолат жорий этишга уриниш иши доирасида 23 йил муддатга озодликдан маҳрум этди. Бу ҳақда The Korea Herald нашри хабар берди.

Айбловга кўра, ҳарбий ҳолат жорий этишга уриниш ташаббуси билан чиққан собиқ президент Юн Сок Ёл бўлган, Хан Док Су эса ушбу қарорни эълон қилишдан олдин ва кейин кўрилган чора-тадбирларга фаол равишда кўмаклашган.

Суд Хан Док Сунинг Юн Сок Ёлга кўмаклашгани деб топди ҳамда ушбу сиёсий инқирозни расман «исён» сифатида баҳолади. Шунингдек, у 6 декабрь куни – ҳарбий ҳолат амалда эълон қилинганидан уч кун ўтиб – тегишли фармонни қалбаки равишда тайёрлаб, имзолаганликда айбдор деб топилди. Бу ҳаракат ҳарбий ҳолатни қонуний кўринишга келтиришга уриниш сифатида баҳоланган.

Бундан ташқари, Хан Док Су Юн Сок Ёлга нисбатан импичмент жараёнида судга ёлғон кўрсатма берганликда ҳам айбланди. У ўша жараёнда ҳарбий ҳолат тўғрисидаги фармондан хабардор бўлмаганини таъкидлаган эди.

Махсус прокурор собиқ бош вазир учун 15 йиллик қамоқ жазоси сўраган бўлса-да, суд унга нисбатан анча оғир ҳукм чиқарди. Хан Док Су суд жараёни давомида барча айбловларни рад этган ва ҳарбий ҳолат жорий этиш режасидан олдиндан хабардор бўлмаганини айтган. Ҳукм ўқиб эшиттирилгандан сўнг у суд залининг ўзидаёқ ҳибсга олинди.

Хан Док Су Жанубий Кореяда 2006-2022 йиллар оралиғида бир неча бор бош вазир лавозимида ишлаган.

Эслатиб ўтамиз, 2024 йил 3 декабрь куни президент Юн Сок Ёл мамлакатда ҳарбий ҳолат жорий этилганини эълон қилиб, бунга «Шимолий Корея коммунистик кучларидан келаётган таҳдид»ни сабаб қилиб кўрсатган эди. Бироқ парламент бир неча соат ичида бу қарорни бекор қилди. Шундан сўнг Юн Сок Ёл исёнга ундашда айбланиб, импичмент қилинди.

Юн Сок Ёл лавозимидан четлатилгандан кейин Хан Док Су вақтинча президент вазифасини бажарувчи бўлган. Бироқ 2024 йил охирида у Конституциявий судга қўшимча уч нафар судья тайинлашдан бош тортгани учун ўзи ҳам импичментга учради. 2025 йил март ойида суд импичментни рад этди ва уни лавозимига тиклади, аммо май ойида Хан Док Су истеъфога чиқди. Июнь ойида эса мамлакатнинг янги президенти этиб Ли Чжэ Мен сайланди.

2025 йил август ойида Хан Док Су «исёнга кўмаклашиш» айби билан жиноий жавобгарликка тортилган, бироқ ҳукм чиқарилгунига қадар озодликда қолган эди.

Шу билан бирга, 13 январь куни прокуратура собиқ президент Юн Сок Ёл учун ўлим жазоси тайинлашни сўрагани ҳам маълум қилинган.