Шимолий Корея раҳбари Ким Чен Ин Олий халқ йиғини сессиясидаги нутқида АҚШни дунё бўйлаб «давлат терроризми ва агрессия»да айблади. Унинг чиқиши матни Шимолий Корея Марказий телеграф агентлиги томонидан тарқатилди.

Ким Чен Иннинг таъкидлашича, «АҚШнинг такаббур ва беандоза зўравон сиёсати инсониятнинг мустақиллик ва тенгликка интилишини сусайтирмади, аксинча Америкага қарши кайфиятни кучайтирмоқда».

Унинг сўзларига кўра, бу ҳолат мустақиллик тарафдори бўлган кучларни янада бирлаштирмоқда ва қаршиликни оширмоқда.

Шу билан бирга, КХДР раҳбари мамлакат ўз миссиясини давом эттиришини билдирди.

«Мустақиллик тарафдори бўлган кучлар бу синовларни енгиб ўтади ва кўп қутбли адолатли дунё барпо этилади», – деди у.

Эслатиб ўтамиз, КХДР раҳбари 2025 йил февралда ҳам АҚШ, Япония ва Жанубий Корея ҳарбий иттифоқини танқид қилган ва бу ҳамкорлик минтақадаги мувозанатни бузишини айтганди.

Шунингдек, у АҚШнинг ядровий кучлари Корея яриморолида жойлаштирилганини хавф сифатида баҳолаган.