Шимолий Корея етакчиси Ким Чен Ин Пхенян умумий шифохонаси қурилиш майдонини кўздан кечирди ва лойиҳага масъул амалдорларни кескин қоралади, деб хабар беради Корея марказий ахборот агентлиги. 

Шимолий Корея етакчиси шифохона қурилиши бир ярим йилга чўзилганидан норозилигини билдирди. Ким Чен Иннинг айтишича, “Вазирлар Маҳкамасининг баъзи етакчи амалдорлари ва қўшма қурилиш штабининг юқори лавозимли ходимларининг амбициялари туфайли маъмурий-ташкилий ишларда тартибсизлик” юз берган. 

Раҳбарнинг сўзларига кўра, айбдор мансабдор шахслар давлат молиявий интизомига эътибор бермаган ва бюджет тасдиқланмасдан ўзбошимчалик билан қурилиш ишларини олиб боришган. Уларнинг хатти-ҳаракатлари катта йўқотишларга олиб келди ва лойиҳанинг бажарилишини кечиктирди. Ким Чен Ин, шунингдек, амалдорларни интизомсизлик ва сиёсий етуксизликда айблади. 

Шу билан бирга, Шимолий Корея раҳбари бажарилган ишлар сифатини юқори баҳолади. У, айниқса, шифохонанинг ўзига хос архитектура услуби ва функционаллигини алоҳида қайд этган.