Шимолий Корея раҳбари Ким Чен Ин шахсий хавфсизлигига масъул бўлган уч нафар юқори мартабали мулозимни ўзгартирди. Бу ҳақда Euronews Жанубий Корея ҳукуматидаги манбаларига таяниб хабар берди.

Шахсий қўриқчилар раҳбарларининг ўзгариши Ким Чен Иннинг ўзига қарши эҳтимолий суиқасдлардан хавотирга тушиб қолгани билан изоҳланмоқда.

АҚШ билан алоқалар совуқлашган бир пайтда КХДР Россияга Украинага қарши урушда минглаб ҳарбий билан кўмак бермоқда. Россия президенти Владимир Путин ҳам Курскдаги ғалабага ҳисса қўшган шимолий кореяликларни эътироф этгани маълум.

Жанубий Корея миллий разведка хизмати (NIS) маълумотларига кўра, Россия-Украина чегараси яқинида тахминан 10 минг шимолий кореялик ҳарбий жойлаштирилган. 2025 йил ноябрь ойида Шимолий Корея Россияга яна 5 минг ҳарбий жўнатган.

Ким Чен Иннинг ўзи Кремль томонидан “Украинадаги вазиятни ҳал қилиш” бўйича кўрилаётган барча чораларни сўзсиз қўллаб-қувватлашини айтиб келади.

Корея миллий бирлашиш институти таҳлилчиси Хонг Миннинг фикрича, Ким Чен Ин шахсий қўриқлаш тизими раҳбариятини ўзгартиргани айнан Украина урушида Россияга кўмак бериши ортидан унга қарши таҳдидлар кучайиши билан боғлиқдир.

“(Россияга Шимолий Корея) қўшини йўлланиши сабабли халқаро жамоатчилик диққат-эътибори ортган бир паллада Ким Чен Ин ўзига қарши украиналикларни жалб этган ҳолда суиқасд уюштирилади деб тахмин қилаётган бўлса керак”,  – дейди таҳлилчи Хонг Мин.

Аввал хабар берганимиздек, 3 январга ўтар кечаси АҚШ Венесуэла пойтахти Каракас ҳамда мамлакатнинг бошқа ҳудудларига ҳарбий ҳужум уюштирди.

Ҳарбий амалиёт давомида Венесуэла президенти Николас Мадуро ва унинг рафиқаси Силия Флорес Каракасдаги саройидан ўғирлаб АҚШга келтирилди. Қўшма Штатлар расмий идоралари Мадурога нисбатан наркотерроризм, гиёҳвандлик моддалари контрабандаси, ноқонуний қурол-яроғ савдоси каби моддалар бўйича айблов эълон қилган.

Пхеньян томонидан хавфсизлик чораларининг кучайтирилиши Ким Чен Иннинг бошига ҳам Мадуронинг куни тушиши мумкин деган ташвиш билан ҳам изоҳланади. Ўзи шундоқ ҳам Шимолий Корея ҳукумати кўпдан буён АҚШни Ким Чен Инни ҳокимиятдан кетказишга уринишда айблаб келади. 

Хабарларга қараганда, Ким Чен Ин кейинги пайтларда хавфсизлик чораларини кучайтириш мақсадида янги-янги ускуна ва технологиялар харид қилган.

Дарвоқе, сўнгги вақтларда Шимолий Корея етакчисига расмий тадбир ва ҳатто хорижий сафарларда қизи Ким Жу Ае ҳамроҳлик қилиши одатга айланди.

12-13 ёшда экани айтилаётган қизалоқ Ким Чен Иннинг вориси сифатида ядро қуролига эга мамлакатнинг келгуси раҳбари бўлиши тахмин қилинмоқда.