АҚШ президенти Доналд Трамп маъмурияти Мали ҳудудида «Жамаат Нусрат ал-Ислом вал-Муслимин» (JNIM) террорчилик гуруҳига қарши ҳарбий операция ўтказиш имкониятини муҳокама қилмоқда. Бу ҳақда The Washington Post нашри манбаларига таяниб хабар берди.

Нашр маълумотига кўра, агар қарор қабул қилинса, Мали Трампнинг иккинчи президентлик муддати бошланганидан буён АҚШ зарбалари амалга оширилган ёки режалаштирилган саккизинчи давлатга айланади. Бунгача бундай операциялар Яман, Сомали, Сурия, Эрон, Ироқ, Нигерия ва Венесуэлага нисбатан муҳокама қилинган ёки амалга оширилган.

Оқ уй Трампнинг Малига зарба бериш нияти бор-йўқлиги ҳақидаги саволга бевосита жавоб бермаган. Маъмурият Шимолий ва Ғарбий Африка давлатларини терроризмга қарши курашиш учун Америка ҳарбий техникасини харид қилишга чақирган.

Нашрнинг таъкидлашича, Малида Россия Мудофаа вазирлигининг «Африка корпуси» бўлинмалари ҳам фаолият юритмоқда. Шу боис, эҳтимолий АҚШ ҳарбий амалиёти томонлар ўртасида кутилмаган тўқнашувлар хавфини ошириши мумкин.

JNIM террорчилик гуруҳи «Ал-Қоида» билан боғлиқ ҳисобланади. Июл ойи бошида ушбу гуруҳ жангарилари ва туарег қўзғолончилари Россиянинг «Африка корпуси» колоннасига ҳужум қилгани ҳақида хабарлар тарқалган.