Бугун, 24 июнь куни Россия президенти Владимир Путин Россия халқига мурожаат қилди. У ўзининг чиқишида Пригожиннинг ҳаракатларини «орқадан пичоқ уруш» деб атади.

«Биз Россия бўлиб қолиш ҳуқуқи учун курашяпмиз, бу жанг барча кучларнинг бирлигини талаб қилади, бизни ажратиб турадиган ҳамма нарса четга сурилиши керак. Ва шунинг учун ҳам бизнинг бирлигимизни парчалаган ҳаракатлар, аслида, муртадлик ва Россия ва халқимизнинг орқасига пичоқ уришдир. 1917 йилда мамлакатимиз Биринчи жаҳон урушида қатнашганда ана шундай зарба берилган ва ғалаба биздан олиб қўйилган», – дейди Путин.

Шунингдек, Путин қўзғолонни тайёрлаганларнинг барчаси муқаррар жазога тортилишини қўшимча қилган.

«Ҳар қандай ички тартибсизликлар давлатчилигимиз учун ҳалокатли таҳдид бўлиб, бундай таҳдиддан ҳимояланиш бўйича қаттиқ ҳаракатлар қиламиз. Қўзғолонни тайёрлаганларнинг ҳаммаси муқаррар жазога тортилади. Қуролли кучлар ва бошқа давлат идоралари зарур буйруқларни олди. Биз хиёнатга дуч келдик, ҳаддан ташқари амбициялар Россияга хиёнат қилишга олиб келди», – деган Россия президенти ўз мурожаатида.

Эслатиб ўтамиз, кеча, 23 июнь куни Евгений Пригожин чиқиш қилиб, Мудофаа вазирлигини «Вагнер» ҳарбийларининг орқа лагерларига ракета ҳужумида айблади ва «бу ваҳшийликка жавоб қайтаришга»,  армия ҳамда умумий Россияда «адолатни тиклашга» ваъда берган эди.

Шундан сўнг, Пригожин Жанубий ҳарбий округ штаб-квартирасида кўриниш бериб, Россия Федерацияси Мудофаа вазири Сергей Шойгу ва Бош штаб бошлиғи Герасимов унинг олдига келмаса, «Вагнер» қўшинлари Москвага боришини айтди.