Россия президенти Владимир Путин Сочида Туркия етакчиси Ражаб Тоййиб Эрдўғон билан учрашув чоғида Москва дон шартномаси бўйича музокараларга тайёр эканини айтди.

«Биламан, сиз бугун ғалла битими масаласини кўтармоқчисиз. Биз бу борада музокаралар учун очиқмиз», — деди Россия президенти.

Ғалла бўйича келишув ўтган йилнинг июль ойида тузилган эди. Унинг доирасида Қора денгизда Украина портларидан ғалла экспорти учун коридорлар яратилди. Шартномаларнинг иккинчи қисмида Россия қишлоқ хўжалиги экспортига чекловларни юмшатиш назарда тутилганди.

Битим бир неча бор узайтирилган, аммо 17 июлда Москва унда иштирок этишни тўхтатганини эълон қилганди. Сабаб – Россия келишувнинг иккинчи қисмига риоя этилмаганини таъкидлади.

Россия ўз талабларига риоя қилган ҳолда шартномаларга қайтишга рухсат беради. Улар орасида Росселхозбанкнинг SWIFT тизимига қайта уланиши, қишлоқ хўжалиги техникалари учун бутловчи қисмларни етказиб беришни тиклаш, Россия ўғитларини экспорт қилишдаги чекловларни олиб ташлаш кабилар бор.