Россия президенти Владимир Путин Москвада АҚШ махсус вакили Стив Уиткофф ва Дональд Трампнинг сиёсий маслаҳатчиси Жаред Кушнер билан ўтказилган музокаралар ҳақида биринчи марта батафсил маълумот берди. Унинг айтишича, учрашув «анча узоқ давом этган», чунки томонлар Трамп таклиф қилган тинчлик режаси бўйича ҳар бир бандни алоҳида муҳокама қилишга мажбур бўлган.

Путин таъкидлашича, Америка делегацияси Москвага олиб келган тинчлик режаси «Трамп билан Аляскада эришилган келишувларга асосланган».

Америкаликлар музокараларда 27 банддан иборат тинчлик режасини 4 та алоҳида пакетга бўлиб, уларни босқичма-босқич муҳокама қилишни таклиф қилган. Москва бу ёндашувни «тушунарли ва амалий» деб атади, аммо натижа борасида ҳали охирги тўхтамга келинмаган.

Путиннинг сўзларига кўра, Россия Украинага урушдан воз кечиш учун бир нечта йўл таклиф қилган. Жумладан, Киевга Донбасстан қўшинларни олиб чиқиш таклиф қилинган ва Украинани «ҳужумга ўтмаслик» ҳақида огоҳлантирилган.

«Аммо Украина ҳарбий йўлни танлади», – деди Путин.

Унинг таъкидлашича, Россия Донбасс ва Новороссияни барибир озод қилади. Бу ҳарбий йўл билан бўладими ёки бошқа йўл биланми, фарқи йўқ.

Эслатиб ўтамиз, Москвадаги Россия–АҚШ музокаралари, расмий баёнотларга қараганда «фойдали ва мазмунли» бўлган, аммо урушни тўхтатиш борасида ҳеч қандай келишувга эришилмаган.

Путиннинг баёнот беришича, Россия Украинадаги ҳарбий мақсадларидан қайтмоқчи эмас. Трамп орқали АҚШнинг воситачилиги эса ҳали натижага олиб келмади.