КХДРда Жанубий Корея сериаллари ва мусиқаларини томоша қилган ёки тарқатганларга нисбатан қатл этиш, меҳнат лагерларига жўнатиш ва омма олдида таҳқирлаш каби жазолар қўлланилмоқда. Бу ҳақда The Sun манбаларга асосланиб хабар берди.

Мамлакатдан қочиб кетган шимолий кореяликлар Amnesty International инсон ҳуқуқлари ташкилотига маълум қилишларича, оғир жазодан қочишнинг бирдан-бир чораси — катта миқдордаги пора. Баъзилар «қайта тарбиялаш лагери»га тушиб қолмаслик учун уйларини сотишади.

Нафақат катта ёшлилар, балки ўсмирларни ҳам аяшмаяпти. КХДРдан қочганларнинг таъкидлашича, бир неча мактаб ўқувчиси «Калмар ўйини» сериалини томоша қилгани учун омма олдида қатл этилган.

Гувоҳларнинг таъкидлашича, ҳибсга олувчиларнинг ўзлари тақиқланган контентни яширинча томоша қилади. Шунингдек, «мафкуравий тарбия» доирасида мактаб ўқувчилари оммавий қатлларга томошага олиб борилади.

Amnesty International суҳбатдошларининг айтишича, жиддий хавф-хатарларга қарамай, КХДРда хорижий контент кенг тарқалган. У Хитойдан яширинча олиб келинади.