АҚШ президенти Дональд Трамп Эрон билан янги музокаралар ўтказиш нияти йўқлигини билдириб, Теҳрондан «сўзсиз таслим бўлиш»ни талаб қилди.

Трамп бу ҳақда ўзининг Truth Social ижтимоий тармоғидаги саҳифасида ёзиб қолдирди.

«Сўзсиз таслим бўлишдан бошқа ҳеч қандай келишув бўлмайди», – деди у.

АҚШ раҳбарининг таъкидлашича, Эронда янги «мақбул ва муносиб раҳбарлар» танланганидан кейин АҚШ ва унинг иттифоқчилари мамлакатни тиклашга ёрдам беради.

«Шундан сўнг биз кўплаб ажойиб ва жасур иттифоқчиларимиз билан биргаликда Эронни ҳалокат ёқасидан олиб чиқиш ва уни иқтисодий жиҳатдан янада катта, яхшироқ ва кучли давлатга айлантириш учун тинимсиз ишлаймиз», – деб ёзди Трамп.

Унинг фикрича, Эрон «катта келажакка эга бўлиши мумкин». Шу билан бирга, Трамп «Make Iran Great Again (MIGA)» шиорини ҳам илгари сурди.

Трампнинг бу баёноти Яқин Шарқдаги кескинлик кучайиб бораётган бир пайтда янгради. АҚШ ва унинг иттифоқчилари Эроннинг ядровий ва ҳарбий инфратузилмаларига қарши операцияларни кучайтиргани ҳақида хабарлар тарқалмоқда.