АҚШда Куба томонидан миллий хавфсизликка гўёки таҳдид мавжудлиги сабабли фавқулодда ҳолат эълон қилинди. Мазкур фармонга АҚШ президенти Дональд Трамп имзо чекди.

«Мен, Дональд Трамп, Америка Қўшма Штатлари президенти сифатида, Куба билан боғлиқ вазият АҚШнинг миллий хавфсизлиги ва ташқи сиёсати учун фавқулодда таҳдид туғдираётганини, унинг манбаи тўлиқ ёки асосан мамлакат ташқарисида эканини ҳисобга олиб, ушбу таҳдид муносабати билан миллий фавқулодда ҳолат эълон қиламан», — дейилади Оқ уй сайтида эълон қилинган ҳужжатда.

Фавқулодда ҳолат билан боғлиқ муаммони ҳал этиш мақсадида Трамп тариф тизимини жорий этишни таклиф қилди. Унга кўра, Кубага нефтни тўғридан-тўғри ёки билвосита сотувчи ёки етказиб берувчи хорижий давлатларда ишлаб чиқарилган товарлар импортига қўшимча бож жорий этилиши мумкин.

11 январь куни Трамп Куба энди Венесуэладан нефть ва молиявий маблағ олмаслигини маълум қилиб, Гаванани келишувга чақирган ва республикага жиддий оқибатлар билан таҳдид қилган эди. Оқ уй раҳбарининг сўзларига кўра, АҚШда «у ерга бориб, ҳаммасини портлатиб юбориш»дан бошқа имконият қолмаган.

28 январь куни АҚШ давлат котиби Марко Рубио Венесуэла президенти вазифасини бажарувчи Делси Родригес Кубага нефть етказиб беришни тўлиқ тўхтатишга ваъда берганини маълум қилди.

Politico газетаси маълумотларига кўра, Трамп маъмурияти Кубага нисбатан янги чора-тадбирларни, жумладан нефть импортини тўхтатиш мақсадида тўлиқ ҳарбий-денгиз блокадасини жорий этиш имкониятини кўриб чиқмоқда. Журналистлар таъкидлашича, АҚШ давлат котиби республикада ҳокимиятни алмаштиришга қаратилган бундай қадамларни қўллаб-қувватлаган.