АҚШ президенти Дональд Трамп Венесуэланинг вақтинчалик президенти Делси Родригес АҚШ билан ҳамкорликдан бош тортса, «жуда оғир оқибатлар»га дуч келиши мумкинлигини билдирди. Унинг сўзларига кўра, Родригес ҳатто амалдаги президент Николас Мадуродан ҳам «юқорироқ нарх тўлаши» эҳтимоли бор.

«Агар у тўғри йўлни танламаса, жуда юқори нарх тўлашга тўғри келади. Балки бу Мадурога нисбатан ҳам оғирроқ бўлар», – деди Трамп The Atlantic нашрига берган интервьюсида.

Нашрнинг қайд этишича, Трамп ушбу баёноти орқали Родригеснинг АҚШ билан ҳамкорликдан «очиқ ва дағал рад этиш»га йўл қўймаслигини аниқ англатган.

Аввалроқ Дональд Трамп The New York Post газетасига берган интервьюсида, агар Делси Родригес Вашингтон талабларига рози бўлса, АҚШнинг Венесуэлада ҳарбий иштирок этишига эҳтиёж қолмаслигини айтган эди.

«Агар у биз истаган ишларни қилса, ҳарбий куч ишлатишга ҳожат бўлмайди», – деган эди Трамп.

Таҳлилчиларга кўра, Трамп маъмурияти Венесуэлада ҳокимият масаласида босимни янада оширмоқда. АҚШ расмийлари мамлакатдаги сиёсий ўзгаришлар, энергетика соҳаси ва минтақавий хавфсизлик масалаларида Каракасдан кескин имтиёзлар кутмоқда.

Эслатиб ўтамиз, АҚШ Венесуэлага нисбатан бир неча йилдан бери санкциялар, дипломатик босим ва сиёсий изоляция сиёсатини юритиб келади.