Трампнинг махсус вакили Путин билан учрашди. АҚШ президенти учрашув якунлари бўйича илиқ фикр билдирди. 

Трампнинг айтишича, Уиткоффнинг Путин билан учрашувида "катта ютуқларга эришилган".

АҚШ президенти Доналд Трампнинг айтишича, унинг махсус вакили Стив Уиткофф Россия президенти Владимир Путин билан жуда самарали учрашув ўтказган. 

"Менинг махсус вакилим Стив Уиткофф Россия президенти Владимир Путин билан жуда самарали учрашув ўтказди. Муҳим ютуқларга эришилди! Сўнгра мен Европадаги баъзи иттифоқчиларимизга маълумот бердим. Бу уруш тугаши керак деган фикрга ҳамма рози ва биз яқин кунлар ва ҳафталарда шу мақсадда ҳаракат қиламиз. Ушбу масалага эътибор берганингиз учун ташаккур!" – деб ёзди Трамп ўзининг Truth Social ижтимоий тармоғида. 

Кремл баёнотига кўра, Уиткоффнинг Путин билан Кремлдаги учрашув тахминан уч соат давом этган. 

Путиннинг ёрдамчиси Юрий Ушаков учрашувдан сўнг журналистларга “Украина инқирози” ва “Россия ва АҚШ ўртасидаги стратегик ҳамкорликнинг эҳтимолий ривожланиши истиқболлари” ҳақида “жуда фойдали ва конструктив суҳбат бўлиб ўтганини” айтди. 

Шу билан бирга, Оқ уй Россияга қарши иккинчи даражали санкциялар 8 август эълон қилиниши мумкинлигини эълон қилди. Эслатиб ўтамиз, Трамп Россияга 12 кунлик муҳлат берган ва бу 8 август куни тугайди.