Украина президенти Владимир Зеленский Россиянинг йирик ракета ҳужумидан сўнгги нутқида Украина бунга жавоб беришини, аммо жаҳон ҳамжамиятининг ҳам шундай қилиши муҳимлигини айтди.

Унинг сўзларига кўра, Россиянинг сўнгги пайтлардаги энг йирик ҳужуми натижасида 100 дан ортиқ хусусий уйлар, 45 та кўп қаватли уйлар, мактаблар, иккита черков, касалхоналар, туғруқхона, кўплаб савдо ва омборхоналар вайрон бўлган ёки шикастланган.

39 киши ҳалок бўлди, 160 дан ортиқ киши яраланди.

«Дунё террорнинг сўнгги кўринишига жавоб бериши муҳим. Бугунги кунда кўплаб раҳбарлар аллақачон Украина ва украиналикларни қўллаб-қувватлашларини эълон қилишган ва мен барчадан миннатдорман. Ва айниқса, бизнинг ҳаво ҳужумидан мудофаа тизимини кучайтиришга бизга ёрдам бераётганларга», — деди Украина президенти.

Зеленский қутқарувчилар, полиция ва қутқарув операцияси ҳамда вайроналарни тозалашда иштирок этган барчага миннатдорчилик билдириб, иш кечаю кундуз давом этишини таъкидлади.

Эслатиб ўтамиз, Украинанинг бир қатор ҳудудлари 29 декабр куни Россия ракеталари зарбасига учради. Маълумотларга кўра, 150 га яқин ракета учирилган. Яқин ўртада Россия томонидан бундай кўламдаги ҳужумлар кузатилмаганди.