Украина президенти Владимир Зеленский идорасининг собиқ раҳбари Андрий Ермак 10,4 миллион доллар миқдорида пул ювишда гумон қилинмоқда.

Украина Миллий Коррупцияга Қарши Бюроси (НАБУ) ва Ихтисослаштирилган Коррупцияга Қарши Прокуратураси (САПО) Украина президенти идорасининг собиқ раҳбари Андрий Ермакка айблов эълон қилди. У Киев яқинида ҳашаматли уй-жойлар қурилиши пайтида 460 миллион гривна (10,4 миллион доллар) миқдоридаги пулларни ювишда иштирок этган уюшган гуруҳ аъзоси деб ишонилади. 

Ноқонуний равишда олинган маблағларни легаллаштириш ва ювиш моддаси бўйича жиноий иш қўзғатилди. Терговчиларнинг сўзларига кўра, Ермак 2021 йилда ва 2022 йил бошида дизайнер билан «Династи» кооперативида қаср қуришни муҳокама қилган. Украина ОАВларининг хабар беришича, қурилиш жараёнини собиқ Жамият ва ҳудудий ривожланиш вазири Олексий Чернишев назорат қилган, унинг рафиқаси қурилиш компаниясида улушга эга. 

Маҳаллий ОАВ илгари Андрий Ермакнинг уйида тинтув ўтказилаётгани ҳақида хабар берган эди. Кейинчалик Ермакнинг ўзи журналистларга «фақат квартира ва машинага эгаман» деб изоҳ берди. У тергов тугагунига қадар қўшимча изоҳ беришдан бош тортди. 

2025 йил ноябр ойида Ермакнинг уйида Украина энергетика соҳасидаги коррупция бўйича тергов доирасида тинтув ўтказилган эди.

Ўша куни Владимир Зеленский Ермакни президент девони раҳбари лавозимидан озод қилди.