Киевда 31 июль куни Россиянинг ракета зарбаси оқибатида ҳалок бўлганлар хотирасига мотам куни ўтказилди.

Украина фавқулодда вазиятлар давлат хизмати Россиянинг ҳаво ҳужумида жами 31 киши, жумладан 5 нафар бола ҳалок бўлганини маълум қилди. Яна 159 киши жароҳатланган.

Киевга қилинган бу зарба 2022 йилдан бери энг қонли зарбалардан бири дея баҳоланди. Украина ҳукумати БМТ Хавфсизлик Кенгашининг шошилинч йиғилишини ўтказиш ташаббуси билан чиқди.

Зеленский ижтимоий тармоқларда вайрон бўлган бино ўрнида қидирув-қутқарув операцияси якунлангани ҳақида шундай ёзди:

«Россия қилаётган ишларни оқлаб бўлмайди. Биз халқимизнинг ўлдирилишини, бу шафқатсиз зарбаларни ҳеч қачон кечирмаймиз. Россиянинг кечаги Киевга берган зарбаси натижасида 31 киши ҳалок бўлди. 159 киши жароҳатланган. Оилалари, яқинлари ва яқинларини йўқотган барчага чуқур ҳамдардлик билдирамиз».

Путин эса Валаам оролидаги матбуот анжуманида бу ҳақда тўхталмади, бироқ у Украинадаги жанговар ҳаракатларни тугатиш истиқболларини шарҳлар экан, «узоқ муддатли, доимий, ҳеч қандай муддатсиз тинчлик» муҳимлигини таъкидлаган.

Путин, шунингдек, «Россияни ҳам, Украинани ҳам қониқтирадиган, ҳар икки давлат хавфсизлигини таъминлайдиган энг асосий таритблар» муҳимлигига ишора қилди.

Ўз навбатида, Зеленский халқаро ҳамжамиятни Россияга нисбатан санкцияларни имкон қадар кучайтиришга чақирди. Унинг сўзларига кўра, биргина июль ойида Россия Украинага қарши 5100 дан ортиқ ҳаво бомбалари, 3800 дан ортиқ «Shaheed» дронлари ва 260 га яқин турли хил турдаги ракеталарни, жумладан 128 баллистик ракеталарни учирди.

«Биз Россиянинг баёнотларини эшитяпмиз. Агар бу уруш учун вақтдан ютиш ёки санкцияларни кечиктириш ҳаракати бўлмаса ва урашни муносиб тарзда тугатиш ва чинакам мустаҳкам тинчлик ўрнатишга жиддий тайёр эканликлари ҳақидаги сигнал бўлса, демак, Украина исталган вақтда етакчилар даражасида учрашишга тайёрлигини яна бир бор тасдиқлайди», – деб ёзди Украина президенти ижтимоий тармоқда.

Эслатиб ўтамиз, яқинда Истанбулда Россия ва Украина делегациялари ўртасида бўлиб ўтган уч раунд музокаралари ҳарбий асирларни алмашишдан ташқари ҳеч қандай аниқ натижага олиб келмади.