Европа футбол уюшмалари иттифоқи (УЕФА) АҚШ терма жамоаси ҳужумчиси Фоларин Балогунга нисбатан қабул қилинган қарор юзасидан ФИФАни кескин танқид қилди.

Гап шундаки, ФИФА интизом қўмитаси Балогуннинг қизил карточкадан кейин автоматик равишда қўлланилиши керак бўлган бир ўйинлик дисквалификациясини бир йиллик синов муддати билан алмаштирди. Бу қарор эса футболчига Жаҳон чемпионати 1/8 финалида Белгияга қарши баҳсда майдонга тушиш имконини берди.

УЕФА тарқатган баёнотда мазкур қарор «мисли кўрилмаган, тушунтириб бўлмайдиган ва асоссиз» деб баҳоланди.

«Қизил карточкадан кейин камида бир ўйинлик автоматик дисквалификация қоидаси истисносиз қўлланилиши керак. Турнир давомида бу каби қоидаларни ўзгартириш мусобақа адолатини шубҳа остига қўяди», – дейилади УЕФА баёнотида.

Ташкилот ФИФАнинг қарори «қизил чизиқдан ўтганини» таъкидлаб, бундай ёндашув футбол қоидаларига бўлган ишонч ва мусобақа нуфузига салбий таъсир кўрсатишини билдирди.

Фоларин Балогун Босния ва Герцеговинага қарши учрашувда қизил карточка олгани учун Белгия билан ўйинни ўтказиб юбориши керак эди. Бироқ ФИФА Интизом қўмитаси ФИФА Интизом кодексининг 27-моддасига таяниб, дисквалификация ижросини бир йиллик синов муддатига алмаштирди.

Бу қарор Белгия футбол федерацияси томонидан ҳам танқид қилиниб, расмий тарзда шикоят киритилган. Шунингдек, хориж ОАВлари АҚШ президенти Доналд Трамп Балогун масаласини қайта кўриб чиқиш юзасидан ФИФА раҳбариятига мурожаат қилгани ҳақида хабар берган.