АҚШнинг Грециядаги элчиси Кимберли Гилфойл шов-шувли можаро сабаб истеъфо берди. У АҚШ президенти Доналд Трампнинг собиқ келини ҳисобланади.

Оқ уй матбуот котиби Кэти Закария «Трамп жамоасида муносиб фаолият юритган» элчи Кимберли Гилфойл ишдан кетганини айтиш билан чекланган.  

Аввалроқ АҚШ оммавий ахборот воситалари Кимберли Гилфойл хизмат ваколатини суиистеъмол қилгани, товламачиликка қўл ургани, ҳатто Греция амалдорларига таҳдид қилгани ҳақида хабар берганди.

Қайд этилишича, Кимберли Гилфойл катта миқдордаги қарзни ёпиш эвазига Трамп маъмурияти билан алоқаларини ишга солиб муайян масалаларни ҳал этишни таклиф қилган.

Матбуот нашрлари, шунингдек, грециялик тадбиркорлар Кимберли Гилфойлнинг дабдабали сафарларини молиялаштиргани, бунинг эвазига элчи хоним уларнинг манфаатларини ҳимоя қилгани ҳақида ёзди.  

Собиқ келини коррупция ва ваколатни суиистеъмол қилиш билан боғлиқ можарога аралашгани Трампни дарғазаб қилган.

The Hill нашрига кўра, АҚШ давлат департаменти хусусий учоқлардан фойдаланиш, гиёҳвандлик моддалари истеъмоли, энергетика ва қурилиш компаниялари билан алоқалар ва ноқонуний равишда совға олиш каби айбловлар бўйича Кимберли Гилфойлга нисбатан текширув бошлаган.

АҚШ Конгресси Вакиллари палатаси аъзоси Грегори Микс элчининг лавозимдан кетиши ноқонуний хатти-ҳаракатлари учун жавобгарликдан озод этмаслигини таъкидлаган.

«Трампнинг мулозими сифатида Гилфойл бойиш учун хизмат ваколатидан фойдаланган бир пайтда америкалик оилалар қимматчилик шароитида яшаб қолиш учун курашмоқда. Конгресс вазият бўйича назорат ўрнатиши ва маъмуриятни ҳам жавобгарликка тортиши керак», — деган Грегори Микс.

Бир муддат кичик Доналд Трамп билан бир ёстиққа бош қўйган Кимберли Гилфойл ўтмишда Fox News телеканали бошловчиси, прокурор каби вазифаларда ишлаган. Унинг коррупция билан боғлиқ айблов ортидан ишдан кетиши оралиқ сайловларга ҳозирлик кўраётган президент Трамп имижига соя солиши айтилмоқда.  

Аввалроқ Доналд Трампнинг куёви Жаред Кушнер ҳам баҳсли лойиҳалар сабаб халқаро можаро марказида қолган эди. Хусусан, The Guardian газетаси Кушнернинг Ғазо секторидаги тинчликпарвар миссияси ортида эҳтимолий тижорий манфаатлар турганини фош этган, Трампнинг куёви Яқин Шарқ дипломатиясини тижорий манфаатларга қориштириб юборгани ҳақида ёзган эди.

Трамп 2025 йилда Қатар амиридан 400 миллион долларлик «учар қаср» — Boeing 747-8 самолётини совға сифатида олгани ҳам Америка жамиятида баҳсларга сабаб бўлгани маълум.