Пентагон Эронга қарши ҳарбий амалиётни давом эттириш учун 200 миллиард доллардан ортиқ маблағ ажратиш бўйича сўровни Оқ уй орқали Конгрессга киритишни таклиф қилди. Бу ҳақда The Washington Post манбалари хабар берди.

Маълумотларга кўра, мазкур маблағ 28 февралдан бошланган урушни молиялаштириш ҳамда қўлланилаётган қурол-яроғ ишлаб чиқаришни ошириш учун сарфланиши режалаштирилган.

Бироқ Оқ уйда барча амалдорлар бу ташаббусни қўллаб-қувватламаяпти. Айрим мансабдорлар бундай катта сумма Конгресс томонидан тасдиқланиши қийин бўлиши мумкинлигини айтмоқда.

Аввалроқ, урушнинг дастлабки 6 кунида АҚШ 11,3 млрд доллар, илк 2 ҳафтада эса 12 млрд доллардан ортиқ маблағ сарфлагани айтилган эди.

Янги сўров эса бу харажатлардан бир неча баробар юқори. Шунга қарамай, аввал АҚШ расмийлари қурол захиралари етарли эканини ва қўшимча маблағ шарт эмаслигини таъкидлаб келган эди.

Пентагоннинг янги сўрови уруш кутилгандан анча қимматга тушаётганини кўрсатмоқда ва бу АҚШ ичида сиёсий баҳсларни кучайтириши мумкин.